DILI, 30 Jullu 2025 (TATOLI)—Organizasaun naun governamental Plan Internasionál Timor-Leste (PITL) planeia sei kontinua habelar advokasia direitu inkluzaun sosiál ba komunidade territóriu masionál.
Diretora Plan Internasionál, Fátima Estrela Soares, hateten hin sira iha ne’e atu selebra susesu ne’ebé sira iha atu halo fali reflesaun prátika di’ak sira-ne’ebé ita iha, tanba ne’e sira mós iha hanoin atu espanda bá iha munisípiu seluk nomós iha komunidade seluk hodi fó benefísiu liután bá sira.
“Antes ne’e mós ami halo intervensaun projetu ida ho naran bá futuru ne’ebé mak seguru no inkluzivu. Projetu ne’e ami implementa iha nunisípiu balun hanesan Ermera, Dili, Ainaru no Baucau. Enkuantu iha ami-nia projetu ida-ne’e ikus ona hodi taka bá programa ne’e no mós selebra atinjimentu husi saida mak durante ne’e ita halo,” Diretora ne’e informa ba jornalista sira iha salaun Delta Nova, Komoro, ohin.
Atividade ida-ne’ebé foka bá direitu ema ho defisiénsia (EhD) no mós maluk sira LGBTQI+, sira hahú ona fó formasaun oinsá hasa’e konxiénsia família nian kona-bá área ida-ne’e no oinsá maka haforsa no empodera ekonómia liuhusi sira rasik hahú husi buat kiik ne’ebé sira iha.
“Projetu ne’e hetan apoiu fundu husi Uniaun Europeia ho montante rihun $700 ho durasaun tempu tinan rua, no progresu sira maka bele muda ona komunidade nia hanoin hodi tau konxiénsia respeitu ba direitu inkluzasaun sosiál nian,” nia dehan.
Tanba,m nia dehan, Plan internasionál iha kompromisu atu proteje no promove inkluzaun sosiál no labele halo diskriminasaun ba direitu umanu.
Xefe suku Maubise Vila, Wilson Maria Pereira, dehan projetu Plan internasionál nian durante ne’e servisu hamutuk ho autoridade lokál sira hodi haree ba asuntu direitu inkluzaun nian ne’ebé durante ne’e sempre mosu diskriminasaun iha sosiedade no mós iha família rasik
“Tanba ne’e, esforsu husi ami autoridade lokál iha papél hodi kontinua promove inkluzaun sosiál besik liu ba ami-nia sosiedade sira hodi garante moris seguru,” nia hateten.
Husi projetu ne’e bele halo onsa transformasaun sosiedade sira-nia hanoin maske labarak liu maibé ida-ne’e mak ema hotu hakarak atu moris ho imparsialiade iha família no mós sosiedade nia leet.
Jornalista : Alexandra da Costa
Editór : Cancio Ximenes
