OEKUSI, 01 Agostu 2025 (TATOLI) – Juíz Administradór iha Tribunál Primeira Instánsia, Rejiaun Administrativa Espesiál Oekusi Ambeno (RAEOA), Evangelino Belo, fó-sai katak, durante féria judisiál, julgamentu iha tribunál Oekusi atende de’it kazu urjente no ba julgamentu normál sei funsiona hikas iha loron 16 Setembru 2025.
“Féria judisiál, komesa ohin loron 01 Agostu to’o dia 15 Setembru 2025, ne’ebé funsionamentu julgamentu normál sei laiha. Só atende de’it ba iha prosesu urjénsia sira, julgamentu normál to’o de’it 31 Jullu horsehik, ohin laiha ona,” Juíz Evangelino Belo, ba jornalista sira iha Oekusi, ohin.
Notísia relevante:Enkontru kortezia ho PA RAEOA, Juís tribunál Oekusi aprezenta problema rua
Nia relata, prosesu urjénsia sira-ne’ebé sei atende iha féria judisiál ne’e mak hanesan karik iha prosesu sumáriu primeiru interrogatóriu no prividénsia kautelár, ne’ebé prosesu normál sei hahú fila-fali iha loron 16 Setembru 2025.
Nia informa, Juíz iha Tribunál Primeira Instánsia Oekusi, durante ne’e iha na’in-rua, mezmu ohin tama ona féria judisiál, maibé tribunál fahe ona tarrefa serbisu, ida sei atende kazu urjénsia husi ohin to’o 23 Agostu, ida fali sei kontinua husi 24 to’o 15 Setembru 2025, hanesan mós ofisiál justisa sira fahe tarrefa atu asegura durante féria judisiál.
“Ne’e la’ós tinan ne’e de’it ami férias. Maibé kada tinan, juís sira iha direitu goza ninia férias, tanba dalaruma serbisu barak, ne’ebé ami mós iha direitu atu deskansa ba festeza hamutuk família,”nia hateten.
Notísia relevante:Tribunál Primeira Instánsia RAEOA rejista kazu pendente 492
Jornalista: Abílio Elo Nini
Editór: Rafael Ximenes de A. Belo
