OEKUSI, 27 Juñu (TATOLI) – Tribunál Primeira Instánsia Rejiaun Administrativa Espesiál Oekusi Ambeno (RAEOA), rejista kazu pendente dezde 2022 to’o maiu 2025 hamutuk 492 tanba númeru juis la sufisiénte atu halo prosesu julgamentu.
“Kazu pendente sira maioria kontra-bandu, abstratu no violénsia doméstika mak sei aas nafatin, no violasaun seksuál uitoan, maibé pendente ne’ebé iha barakliu ne’e, prosesu koletivu, ba singulár hela uitoan de’it, kona-ba koletivu agora ami marka ona kalendáriu to’o 2026 tanba númeru juis limitadu afeta kazu sira-ne’e pendente dezde 2022 to’o agora seidauk halo prosesu,” Juis Administradór Tribunál Primeira Instánsia Oekusi, Evangelino Belo, hateten, iha Oekusi ohin.
Notísia relevante:Tribunál Oé-Cusse funsiona hikas hafoin féria judisiál
Totál prosesu kazu ne’ebé pendente iha tribunál Oekusi hamutuk 492, kompostu husi kazu krime hamutuk 366 no balun mak prosesu koletivu no singulár. Iha prosesu koletivu ne’e daudaun ne’e rejista hamutuk 266 no prosesu singular hamutuk 100.
“Kazu sira-ne’e pendente la’os prosesu lala’o maibé agora marka ona kaléndariu julgamentu, hein de’it atu halo prosesu julgamentu, maibé tanba tribunál Oekusi problema rekursu umanu,” nia informa.
Tanb ne’e, nia dehan atu solusiona problema ne’e, nia-espera katak kandidatu juis na’in-13, ne’ebé daudaun ne’e hala’o hela estudu iha Portugál, kuandu fila mai bele kontribui hodi halo redusaun ba prosesu kazu sira-ne’ebé pendente tinan barak ona.
Notísia relevante:Féria judisiál, julgamentu iha Tribunál Oé-Cusse ba de’it kazu urjénsia
Journalista: Abílio Elo Nini
Editór: Florencio Miranda Ximenes
