DTSR eleva koñesimentu ba membru polísia tránzitu iha Oekusi

OEKUSI, 04 Agostu 2025 (TATOLI) – Komandu Polísia Nasionál Timor-Leste (PNTL) liuhusi Departamentu Tránzitu no Seguransa Rodaviária (DTSR), segunda ne’e, abertura formasaun ba membru Polísia tránzitu na’in-35 kona-ba papél tránzitu no étika komunikasaun  durante loron 10 iha Rejiaun Administrativa Espesiál Oekusi Ambeno (RAEOA).

Xefe Departamentu Tránzitu no Seguransa Rodaviária Nasionál, Superintendente Asistente Polísia, Luís da Costa, informa katak formasaun ne’e nu’udar planu husi DTSR, kada tinan implementa, atu fasilita formasaun espesiál ba serbisu tránzitu sira iha munisípiu, alvu ba membru tránzitu inklui Ofisiál Polísia Suku (OPS)

“Formasaun ne’e, polítikamente, husi Diresaun Nasionál Tránzitu Seguransa Rodaviáriu nian. Kada tinan, ita sempre realiza ba munisipíu sira, ita espera katak liuhusi formasaun ne’e, bele fó koñesimentu di’ak ba ita-nia membru sira, atu bele hala’o sira-nia kna’ar ho didi’ak, sai polísia ne’ebé profisionál atu-bele atende públiku nia hakarak liuliu ba iha serbisu tránzitu nian, tanba loron-loron ema hotu hatene no haree sira mak hamrik iha luron, tan ne’e mak presiza koñesimentu di’ak,” nia ko’alia iha komandu PNTL Oekusi, ohin.

Notísia relevante:PNTL Oé-Cusse kontribui reseita rihun $53-resin ba kofre Estadu

Nia informa, Matéria sira-ne’ebé formandu na’in-35 sei aprende iha semana rua nia laran mak liuliu ba área tranzitu, étika komunikasaun, no mós parte jurídiku nian, atu hasa’e koñesimentu kona-ba lei sira-ne’ebé iha PNTL,  “Ne’ebé, ita espera nafatin durante formasaun bele eleva sira-nia kapasidade aumenta sira-nia matenek, oinsá atu bele serbisu ho di’ak no fuan ba komunidade  sira iha Oekusi,” nia fó hanoin.

Iha biban, Komandante Interinu PNTL Oekusi, Superintendente Asistente Polísia, Jaimitu Hei, nia enkoraja formandu 35, atu partisipa formasaun ho pontualidade tanba formasaun nesesáriu ba komandu PNTL Oekusi.

“Hato’o agradese ba komandu nasionál tanba tinan ne’e bele fasilita formasaun ba membru tránzitu sira iha Oekusi atu hasa’e atendimentu profisionál liután, ami  konsidera formasaun importante tebes, entaun saida mak ami kumpre, ha’u hanoin durante loron 10 formandu sira tenke hatudu pontualidade dixiplina ba tempu, labele lisensa ou ba atividade maibé tuir ho sériu,” nia orgullu.

Notísia relevante:PNTL Oé-Cusse sensibiliza knaar polisiamentu komunitáriu iha suku no aldeia

Jornalista: Abílio Elo Nini

Editór: Rafael Ximenes de A. Belo