PNTL Oé-Cusse kontribui reseita rihun $53-resin ba kofre Estadu
OÉ-CUSSE, 23 Janeiru 2025 (TATOLI)– Husi janeiru to’o Dezembru 2024, Komandu Polísia Nasionál Timor-Leste (PNTL) Rejiaun Administrativa Espesiál Oé-Cusse Ambeno (RAEOA), kontribui reseita hamutuk $53,017.00 ba kofre Estadu liuhusi servisu tránzitu nian.
“Reseita sira-ne’e, rekolla mai husi pasa-revista ba transporte inklui aplika sansaun administrativa bainhira dokumentu kaduka no kontra sinál tranzitu nian. Nune’e Komandu PNTL hamutuk ho VIP pontu entrada Sakato, konsege rekolla reseita $53,017.00 ba kofre Estadu,” relata Komandante PNTL Oé-Cusse, Superintendente Polísia, Nicolau Francelino da Costa, ba jornalista sira iha Oé-Cusse, ohin.
Notísia relevante:PNTL Oé-Cusse halo apreensaun ba motorizada sia
Reseita hirak ne’e rekolla hahú iha Janeiru hamutuk $2,342.00, Fevereiru mak $1,727.00, Marsu ho $2,463.00, Abríl mak $2,550.00, Maiu ho $558,00, Juñu $1,412.00, Jullu $1,496.00, Agostu $1,113.00, Setembru $1,192.00, Outubru $4,246.00, Novembru $6,316.00 no Dezembru $4,284.00.
Kona-ba tipu reseita nia dehan simu husi infratór sira seidauk rejistu transporte iha DNTT hamutuk 17, kontra ordén autoridade 213, kontra sinál tranzitu 107, data inspesaun liu prazu 17 , la lori dokumentu viatura 69, la monta xapa mátrikula 43, la uza kapasete oin no kotuk 58, totál pasajeiru liu lotasaun tantu motorizada no karreta 30, laiha asesoria veíkulu 42, para iha zebra-cross 7, uza kanu resin 22, karta kondusaun la tuir kategória 4.
Entretantu, Identifikasaaun iha fatin asidente tolu , sirkula ho kondisaun lanu hamutuk sia, tula naha liu karrosa 2, karta kondusaun kaduka 22, halai ho velosidade maka’as neen, para trasporte iha kruzamentu na’in-ida, uza vidru-metan ka nakukun 12, lisensa tranzitu kaduka hamutuk lima.
Notísia relevante:2024, PNTL Oé-Cusse rejista kazu 596 no na’in-11 tama prizaun
“Ita bele halo auto apreensaun ba sira, hodi kumpre regulamentu tarefa tránzitu nian, maibé aplika sansaun ne’e la hanesan, tanba iha tipu infrasaun, balun lori karreta la ho dokumentu, lori motorizada la ho kapasete no dokumentu la kompletu,”nia afirma.
Nune’e, Komandante PNTL iha RAEOA, hakarak hato’o mensajen ba sidadaun hotu iha territóriu Oé-Cusse, Aatu koopera hodi labele kontra sinál tranzitu, ba sira-neʼebé utiliza transporte tantu privada no publiku, presiza kumpre regra.
Notísia relevante:Motorizada ilegál 1.919 iha Oé-Cusse hahú rejista atu hetan dokumentu
Jornalista: Abílio Elo Nini
Editór: Florencio Miranda Ximenes
