DILI, 04 Agostu 2025 (TATOLI) – Vise-Ministra ba Asuntu ASEAN, Milena Maria da Costa Rangel, informa katak karta admisaun Timor-Leste nian ba ASEAN hetan ona aprovasaun husi Konsellu Ministru iha Palásiu Governu, Dili.
“Ohin, Konsellu Ministru aprova buat boot rua, ida mak ita-nia karta admisaun ba karta ASEAN, ida fali kona-ba ita nia adezaun hanesan membru plenu,” Milena hateten ba Agência TATOLI hafoin ramata reuniaun Konsellu Ministru.
Nia dehan, ratifikasaun deklarasaun kona-ba admisaun Timor-Leste iha ASEAN, hanesan étapa esensiál ida ba Timor-Leste nia integrasaun tomak iha ASEAN, bazeia ba nu. 4 artigu 6.o Karta ASEAN nian, ne’ebé nia asinatura kona-ba admisaun Timor-Leste ba ASEAN, ne’ebé sei hala’o iha Malázia iha loron 26 fulan-outubru tinan-2025, reprezenta aseitasaun polítika husi parte Estadu-Membru ASEAN kona-ba inkluzaun Timor-Leste hanesan futuru Estadu-Membru organizasaun ne’e nian.
Atu subliña katak adezaun ba ASEAN nu’udar prioridade nasionál ida no lori vontade soberanu povu timoroan nian atu partisipa ativu hodi promove pás, estabilidade, dezenvolvimentu sustentável no prosperidade partillada iha rejiaun.
Sorin seluk, Proposta Rezolusaun Parlamentu Nasionál, ne’ebé ratifika adezaun Timor-Leste ba Karta ASEAN nian hetan mós aprovasaun husi Konsellu Ministru.
Karta ASEAN ne’e, adota iha Singapura iha loron 20 fulan-novembru tinan-2007, reprezenta valór no aspirasaun komún povu sira Sudeste Aziátiku nian ba pás, estabilidade, progresu ekonómiku no protesaun ba direitu fundamentál sira.
Adezaun formál ba Karta ASEAN ne’e sei permite Timor-Leste hodi ezerse tomak direitu no asume responsabilidade Membru organizasaun nian, no asegura ninia partisipasaun ativa iha órgauns rejionais no kontribui ba kooperasaun no integrasaun kle’an liu iha Sudeste Aziátiku.
Aprovasaun no ratifikasaun Karta ASEAN, hanesan kondisaun ida atu adere ba ASEAN.
Jornalista : Hortencio Sanchez
Editór : Rafael Ximenes de A. Belo
