DILI, 08 Agostu 2025 (TATOLI)—Prezidente Autoridade Aviasaun Sivíl Timor-Leste (AACTL, sigla portugés), Zezinho Antonio F. Gusmão, hateten tempu badak sira sei ba halo avaliasaun ba ajénsia sentrál Citilik, atu identifika loloos kondisaun aviaun nian ne’ebé foin lalais la funsiona hodi halo emerjénsia landing iha aeroportu El Tari Kupang (NTT), Indonézia.
Notísia Relevante: Fernando klarifika voo Citilink Denpasar-Dili halo “emergency landing” iha aeroportu El Tari
“Antes ne’e, ami fó ona karta pedidu ba ajénsia sentrál Citilink hodi hasoru malu no sira mós konkorda ona atu halo avaliasaun,” Prezidente ne’e informa ba jornalista sira iha salaun auditóriu Kay Rala Xanana Gusmão iha Ministériu Finansa, Aitarak-Laram, ohin.
Nia dehan, husi parte ajénsia Citilink hato’o ona razaun sira ho insident record, depois liu tiha loron rua sei iha fali fallansu ne’ebé deley (adianta) tan oras ida to’o oras neen,” nia informa.
Tanba ne’e faillansu sira-ne’e ACCTL halo ona investigasaun to’o torre kontrolu Timor-Leste nian, iha momentu ne’e mós tanba sira iha ona arriver, nune’e la konsege kontaktu ho aviaun no aviaun mós seidauk tama iha zona kontrola Timor-Leste nian.
“Ita mós tenke husu informasaun ba kontroladór Kupang (NTT) nian, tanba buat sira-ne’e presiza tuir prosedimentu. Ami halo ona karta ba aviasaun sivíl Indonézia nian hodi husu kronolójia, no fallansu ne’e dalaruma busi ruma kuak mak halo oli menus, hodi konsidera katak nia iha faze emerjénsia,” nia hateten.
Nia informa, tempu badak AACTL sei hasoru malu ho ajénsia Citilink hodi haree fila-fali akordu ne’ebé asina no sertifika ona ne’e, no indika prosedimentu barak hodi obriga sira kumpre atu fallansu sira hanesan ne’e labele akontese tan.
“Iha akordu ne’e deklara mós katak ACTL iha kompeténsia hodi suspende ka fó xamada atensaun ba operadór hodi troka ba aviaun Garuda. Husi inísiu ita husu aviaun Garuda mak halo operasaun maibé tanba sira-nia sukursál (anak cabang) mak Citilink entaun ne’e mak ita aseita,” nia dehan.
Jornalista : Alexandra da Costa
Editór : Cancio Ximenes
