DILI, 28 Jullu 2025 (TATOLI)—Diretór Ezekutivu aviaun komersiál Citilink, Fernando da Silva, klarifika kona-ba insidente voo Citilink nian ne’ebé horisehik (domingu, 27 Jullu 2025) tenke halo emergency landing iha aeroportu El Tari, provinsia Kupang, Nusa Tengara Timur (NTT), Indonézia, tanba fallansu tékniku iha mákina aviaun nian mak hafoin kontinua voo mai Dili.
“Kona-ba insedente bainhira aviaun Citilink voo (flight) husi Denpassar (Bali) mai Dili no to’o iha Maubara, kapitaun pilotu atu tun (landing) maibé hetan indikasaun problema iha mesin liman-karuk nian, nune’e sira foti desizaun landing fali iha aeroportu El Tari Kupang. Normalmanete bainhira problema akontese iha mundu aviasaun pilotu tenke tuir estandarizasaun operasionál nian hodi haree katak aeroportu ida-ne’ebé mak besik, entaun sira tenke landing iha aeroportu ne’ebé mak besik,” Diretór Ezekutivu aviaun komersiál Citilink, Fernando da Silva, klarifila ba jornalista sira iha nia edifísiu Fomentu 2, Komoro, ohin.
Fernando afirma, tanba agora aeroportu Komoro daudaun me’e, Governu mós planeia atu ba estensaun no tanba seidauk iha espasu ne’ebé bele refere ba emergency landing tanba Timor-Leste nia run away ne’e lato’o metru 2500.
“Entaun ba pasajeiru sira-ne’ebé baibain hala’o hela de’it viajen ho aviaun hatene, katak ida-ne’e la’ós problema boot iha iha mundu aviasaun ka dehan emergency landing. Maibé, ne’e normál, tanba sinál insidente ne’e hatudu kiik,” nia dehan.
Nia haktuir, enkuantu bainhira to’o iha Kupang, Nusa Tengara Timur (NTT) Indonézia pasajeiru sira ita hatun hotu no enjiñeiru sira deteta katak aviaun ne’e iha problema ho mákina liman karuk nian, entaun presiza tékniku husi sentrál Jakarta mak bele ba haree.
“Nune’e Ajénsia sentrál Citilink foti desizaun katak, labele tula tan pasajeiru sira hodi hein inspesaun husi enjineiru sira, tabba ne’e mak ita halo koordenasaun hodi foti aviaun foun husi Kupang mai Dili,” nia hateten.
Nia informa, tenke husu autorizasaun husi parte aeroportu nian no departamentu aviasaun Indonézia tanba oras landing lahanesan ho Indonézia ho Timor-Leste nian, nune’e presiza halo koordenasaun.
Ba future, autoridade aeroportu no aviasaun sivíl sira sei preparadu bainhira aviaun ruma iha problema hodi landing iha oras kalan sira prontu halo atendementu.
Entretantu, totál pasajeiru hamutuk 155 mak halo viajen husi Denpasar (Bali) mai Dili, maske loloos ne’e pasajeiru hamutuk nain-157 maibé na’in-haat (4) mak kansela.
Jornalista : Alexandra da Costa
Editór : Cancio Ximenes
