Edukasaun Oekusi identifika ona suku ualu atu harii Ensinu Pré-Eskolár iha 2026

OEKUSI, 08 Agostu 2025 (TATOLI) – Sekretária Rejionál Edukasaun no Asuntu Sosiál, iha Rejiaun Administrativa Espesiál Oekusi Ambeno (RAEOA), Inácia Tamele, fó-sai katak, serbisu edukasaun identifika ona suku ualu iha sub-rejionál haat atu harii Ensinu Pré-Eskolár (EPE) ualu iha 2026.

Notísia relevante:Tinan rua ona, konstrusaun Ensinu Pré-Eskolár Paineno iha Oekusi abandonadu

Inácia Tamele, informa, fundu atu harii Ensinu Pré-Eskolár ualu ne’e, orsamentu mai husi Ministériu Edukasaun la’os orsamentu husi RAEOA nian, tan ne’e, serbisu edukasaun Oekusi, sei esforsa atu hala’o sosializasaun ba komunidade sira iha nível suku no aldeia.

“Durante ne’e ita foin iha Ensinu Pré-Eskolár 16, entaun Ministériu Edukasaun liuhusi Diresaun Nasionál Edukasaun Pré-Eskolár, mai halo sosialializasaun ba Diploma Ministeriál númeru 64/2024, tanba iha tinan-2026 sei espanda tan pré-eskolár ba suku ualu ne’ebé ita identifika, mak hanesan, iha Pante Makasar sei harii iha suku Nípani no Kutete, sub-rejiaun Oésilo harii iha suku Usitaqueno, sub-rejiaun Nítibe sei harii iha suku Ban-Afi, Bene-Ufe, Usitaku, Suni-Ufe, no sub-rejiaun Pássabe iha suku Malelat, ne’ebé nia orsamentu mós husi ministériu,” Inácia Tamele hateten iha Oekusi.

Autoridade rejionál ne’e informa, objetivu atu harii eskola EPE foun ualu ne’e, atu prepara labarik sira antes kontinua sira-nia estudu iha ensinu báziku, tanba garante kualidade edukasaun la’o di’ak, tenki prepara husi uma ka família, depois ba pré-eskolár, nune’e iha futuru kontinua ba ensinu báziku primeiru to’o terseiru siklu, ne’e fasíl ona atu aprende.

“Sekuandu fundasaun hanesan pré-eskola laiha, entaun kualidade edukasaun bele la’o ladun di’ak, tanba sira la hahú husi inísiu, hanesan karaktér mentál prepara oinsá lee, hakerek no sura hatene, antes ba ensinu báziku. Ne’ebé, planu ne’e ita sei harii iha tinan oin, entaun agora ita hahú prepara rekursu umanu, aliende ne’e sei halo mós sosializasaun ba komunidade no autoridade lokál sira,” nia hateten.

Notísia relevante:Ministériu Edukasaun introdus planu estabelesimentu Ensinu Pré-Eskolár iha Oekusi

Entretantu, totál Ensinu Pré-Eskolár iha Oekusi hamutuk 16 ho totál estudante hamutuk 907 komposta husi mane 457 no feto 450. Kona-ba Ensinu Báziku hamutuk 80, Ensinu Sekundáriu Jerál iha ualu no Ensinu Sekundáriu Tékniku Vokasionál iha haat.

Jornalista: Abílio Elo Nini

Editór: Rafael Ximenes de A. Belo