OEKUSI, 05 Agostu 2025 (TATOLI) – Projetu konstrusaun Ensinu Pré-Eskolár (EPE), ne’ebé konstrui iha 2023 iha bairru Paineno, aldeia Fatubijae, suku Bobokase sub-rejiaun Pante Makassar, Rejiaun Administrativa Espesiál Oekusi Ambeno (RAEOA) abandona durante tinan rua ona.
Notísia relevante:RAEOA aloka millaun $2-resin harii eskola foun 19 no hadi’a edifísiu rua
Celestinho Cusi, nu’udar komunidade iha aldeia Paineno, rekomenda ba Autoridade RAEOA liuliu serbisu edukasaun rejionál atu finaliza.
“Ami sente preokupa tanba durante ne’e ami hein hela projetu ne’e, atu ami-nia oan sira tama eskola, maibé eskola harii iha 2023 agora tinan rua ona, setrbisu seidauk hotu, kompañia husik tiha, ita haree taka hela ho ai iha odamatan, atu labele tama ba laran, ne’ebé ami ba Governu liuliu edukasaun tenki mai haree,” nia dehan ba jornalista sira iha Oekusi, ohin.
Tuir nia observasaun, Ensinu Pré-Eskolár ne’e, konstrui ho objetivu fasilita labarik sira iha área rurál hanesan Paineno bele asesu ba edukasaun formál pré-eskolár ho distánsia besik, maibé to’o ohin loron, projetu eskola referidu seidauk finaliza husi hodi entrega ba Governu.
“Durante tempu ukun aan to’o ohin, ami-nia oan sira sei ki’ik-oan tenke la’o de’it ho distánsia kilometru rua, husi Paineno hodi ba eskola iha aldeia Netennoke. Tanba ne’e, ami husu Governu atu finaliza ona projetu eskola ne’e, nune’e ami bele utiliza ba prosesu apreedizajen,” nia rekomenda.
Hatan ba rekomendasaun ne’e, Sekretária Rejionál Edukasaun no Asuntu Sosiál, Inácia Tamele, rekuñese projetu Ensinu Pré-Eskolár Paineno abandonadu, tanba ne’e sei orienta ekipa inspesaun atu observa no komunika responsavél kompañia.
“Ami sei orienta ekipa inspesaun sira, atu bele ba haree, tanba konstrusaun ne’e harii iha autoridade anteriór, maibé kuandu atu harii eskola iha suku ou bairru ida, ita presiza haree husi totál uma-kain no identifika labarik sira,” nia konsidera.
Notísia relevante:Autoridade RAEOA harii pré-eskolár rua no EBF ida iha aldeia Sanane
Entretantu, to’o notísia ne’e tuun, Jornalista Ajénsia TATOLI,I.P, seidauk hetan konfirmasaun husi kompañia konstrutora tanba seidauk hetan nia paradeiru no laiha kuadru ba projetu, maibé observa, katak projetu Ensinu Pré-Eskolár Paineno seidauk finaliza hanesan pinta, haris-fatin, tanke-bee-moos, no mós kanaliza kanu husi haris-fatin ba posu.
Projetu Ensinu Pré-Eskolár Paineno ne’e, ezekuta ho valór orsamentu $94,989.29, projetu ne’e konstrui iha tinan 2023 iha mandatu Autoridade Sesante, tuir loloos projetu ne’e finaliza iha tinan 2024.
Jornalista: Abílio Elo Nini
Editór: Rafael Ximenes de A. Belo
