OEKUSI, 11 Agostu 2025 (TATOLI) – Komandante Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), Superintendente Asistente Polísia, Angelo Quelo, informa, prosesu distribuisaun formuláriu ne’e, hahú husi loron 06 to’o 10 Agostu 2025 rejista ona konkorrente 1.327
“Maibé, husi númeru ne’e, barak mak la pasa iha altura no barak nia idade liu ona, sira-ne’ebé pasa iha iha idade no altura hamutuk 554, seidauk sura ohin nian tanba prosesu sei la’o hela, barak mak sei forma hela, ne’ebé restante idade liu ona no altura la to’o metru 1.58 ba feto no 165 ba mane,” Angelo Quelo, ba jornalista sira iha komando PNTL Oekusi, ohin.
Nia esplika, data submisaun dokumentu sei hahú aban loron 12 to’o loron 09 Setembru 2025, nune’e tempu sufisiente ba kadete foun sira atu trata sira-nia dokumentu tuir kritéria sira ne’ebé define iha diploma ministeriál númeru 17/2025, 25 Juñu nian.
Iha biban ne’e, autoridade polisiál ne’e apela ba joven feto no mane ne’ebé sei hela iha área rurál seidauk asesu formuláriu, Komandu PNTL kontinua fó tan tempu to’o loron 29 Agostu 2025. Nune’e mós sira-ne’ebé asesu ona formuláriu, antes halo prenximentu, presiza haree didi’ak, konsulta ho hakerek ho letra ida-ne’ebé fasil atu lee komprende no presiza kompleta.
“Maibé iha orientasaun husi komisaun katak bainhira submete dokumentu mai iha komandu sei verifika, karik la kompletu, ita fó hanoin no fila-fali atu halo kompletu tuir kritéria ne’ebé públika ona antes,” nia informa.
Observasaun Jornalista Ajénsia TATOLI,I.P, iha terrenu nota katak, prosesu distribuisaun formuláriu hahú sukat kandidatu sira-nia altura tuir dekretu-lei ne’ebé fó ba feto tenke metru-1,58 no ba mane metru-1,65, hafoin pasa kontinua kedas simu formuláriu ne’ebé fahe ba oin tolu mak hanesan formuláriu jerál ba konkursu, formulariu ba xefe suku, administradór no komandante eskuadra sira-nia asina no formuláriu ba inan-aman veteranu sira-nia oan.
Notísia relevante:PNTL Oekusi hahú halo distribuisaun formuláriu rekrutamentu ba membru foun
Entretantu, data distribuisaun formuláriu ne’e hahú iha loron 05 to’o 29 fulan-Agostu 2025, no iha loron 12 fulan-Agostu to’o loron 09 fulan-Setembru aplikante sira tenke submete filafali formuláriu ne’e hodi tama ba selesaun dokumentus.
Entertantu, kritéria sira ne’ebé define iha diploma ministerial nú. 17/2025 maka:
- Sidadaun Timor-Leste
- Domina pelumenus lian ofisiál ida
- Sei klosan
- Iha kualifikasaun akadémika minimu 12° ano ka ekivalente
- Sidadaun entre tinan-18 to’o 23 to’o loron 31 fulan-dezembru 2025
- Aas mínimu 1,58 m ba feto no mane 1,65 m Iha aptidaun fiziku no mental rekoñesidu ba ezersísiu knar polísia nian
- Iha kualidade morál apropriadu no komportamentu síviku neʼebé permite sira atu atua ho justisa, lealdade, integridade, onestidade, kompeténsia profesionál, hodi hamosu konfiansa no respeita husi populasaun no kontribui ba prestíjiu PNTL no instituisaun demokrátiku sira
- La hetan ezonerasaun hosi instituisaun Estadu nian seluk
- La hetan kondenasaun tanba krime internasionál sira
- Hatudu adekuasaun ba ezersísiu funsaun polísia nian, ne’ebé karakteriza ho la sai arguidu iha kualkér prosesu kriminál neʼebé la’o hela no mós la sujeita ba medida koesivu, akuzasaun formál, ka julgamentu krime internasionál ho ofensa kriminál ne’ebé hetan kastigu tinan tolu iha prijaun
- Disponível ba kna’ar iha ne’ebé de’it iha territóriu nasionál, bainhira tuir no kompleta iha susesu CFA-PNTL, tuir nesesidade PNTL nian.
Distribuisaun vaga 400 ne’e ba munisípiu 12 inklui Ataúro no Rejiaun Administrativa Espesiál Oekusé Ambeno (RAEOA), Ataúro vaga ba ema 10, Aileu 20, Ainaro 25, Baukau 40, Bobonaru 40, Kovalima 25, Dili 40, Ermera 37, Lautein 27, Likisá 26, Manatutu 25, Manufahi 25, RAEOA 25, no Vikeke 35.
Notísia relevante:Governu depozita konfiansa ba ekipa juri iha rekrutamentu PNTL foun
Jornalista: Abílio Elo Nini
Editór: Rafael Ximenes de A. Belo
