OEKUSI, 08 Maiu 2026 (TATOLI) – Juventude no estudante sira iha Rejiaun Administrativa Espesiál Oekusi Ambeno (RAEOA) hatudu ho asaun konkreta sira-nia nasionalizmu no patriotizmu. Ho konsiénsia sívika no orgullu nasionál, sira hahú ona preparasaun simu Selebrasaun Loron Restaurasaun Independénsia 20 Maiu ba dala-24, liuhusi hasa’e ho ksolok Bandeira Repúblika Demokrátika Timor-Leste (RDTL) iha uma-oin, estabelesimentu komersiál no transporte sira.
Agustinho Elo, nu’udar akademista husi DIT Oekusi, hateten, oras ne’e Goverenu Sentrál aprova ona tema jerál ba loron Restaurasaun Independénsia 20 Maiu maka ‘Hamutuk ita sei harii pátria ida-ne’ebé justa, inkluziva no reziliente liután’.
“Liga tema ida-ne’e, ha’u hanoin, sentimentu povu Oekusi orgullu hodi simu Loron Restaurasaun Independénsia 20 Maiu, tanba loron istóriku ne’e la’ós hanoin de’it ba festa maibé momentu ida-ne’ebé ita atu refleta sakrifísiu ne’ebé ita-nia éroi sira halo ona ba rai ida-ne’e to’o ukun rasik-an, tanba ne’e maka tuir ita-nia observasaun, komunidade, transporte karreta, motor no loza sira, edifísiu públiku sira, maioria hothotu dada bandeira RDTL,” nia hateten ba Ajénsia Tatoli, I.P iha Oekusi, ohin.
Tuir nia, ne’e hatudu katak, povu entuziasmu hodi simu Loron Restaurasaun Independénsia RDTL nian, tanba la presiza Governu ka nai-ulun sira fó avizu mak hasa’e bandeira iha uma oin, maibé povu komesa iha ona konsiénsia ne’ebé boot, atu valoriza sentimentu patriotizmu no nasionalizmu hodi garante unidade nasionál, nune’e bele simu dezenvolvimentu ne’ebé di’akliu ba povu.
Notísia relevante:RAEOA propoin rihun $31 utiliza ba selebrasaun Loron Restaurasaun Independénsia
Avelino Neve Tilo, nu’udar estudante husi DIT Oekusi afirma, “Hanesan estudante, ha’u senti kontente bainhira ha’u observa iha sosiedade barak mak hasa’e bandeira, ne’e hanesan loron espesiál ba povu Timor-Leste, entaun nu’udar sidadaun nu’udar povu ita tenke kontenti atu preparaan ho reflesaun hodi simu Loron Restaurasaun Independénsia ne’e ho domin, tanba ita-nia independénsia agora selebra ba dala-24, ne’ebé nu’udar jerasaun kontinuadór ba nasaun ne’e ita tenke respeita hasa’e bendera iha uma oin, loza oin no transporte sira”.
Nune’e mós, Jelinha Florencia Sequeira, nu’udar estudante, akresenta: “Ne’e obrigatóriu husi Governu katak hothotu tenke hasa’e bandeira, tanba ita nu’udar timoroan, tenkisér iha konsiénsia ho haksolok, tanba ho loron Restaurasaun 20 Maiu ne’e, maka ohin loron Timor-Leste bele moris ho dame no harii Liberdade iha ita-nia nasaun ida-ne’e”.
Notísia relevante:Reflesaun nasionalizmu: aprende husi insidente iha selebrasaun tinan 23 Restaurasaun Independénsia
Tuirmai, Agustinho Colo hatutan, “Nu’udar estudante, nu’udar mós sidadaun timoroan ida, la presiza avizu tuir dalan atu hasa’e bandeira iha uma oin, maibé konsiénsia rasik, tanba ha’u hatene katak, fulan-Maiu ne’e tama ona ba loron boot, loron independénsia ba ita-nia rai”.
Bernardo Teme, motorista tum-tum énfaze, “Agora ita besik ona ba loron Restaurasaun Independénsia 20 Maiu, ita tenke uza bandeira hatudu katak, ita nu’udar sidadaun Timor-Leste, ne’ebé ita tenke tau bandeira iha transporte nu’udar respeita ba ita-nia nasaun nia loron independénsia, ne’ebé bandeira ne’ebé ha’u kesi hola iha loja dolár $1, tenke tau iha ha’u-nia tum-tum, atu hatudu ita-nia nasionalizmu ba rai ne’e”.
Notísia relevante:
Jornalista: Abílio Elo Nini
Editór: Rafael Ximenes de A. Belo
