DILI, 12 Agostu 2025 (TATOLI)—Institutu Siénsia Saúde (ICS, sigla portugés) seidauk simu subvensaun públika tinan ida-ne’e nian.
“Osan to’o agora seidauk transfere mai ami, akordu ami asina iha 25 Jullu 2025 ba montante orsamentu hamutuk $115.500,” Reitór ICS, Leão Borges, informa ba Ajénsia TATOLI, iha resintu Eskola Ensinu Sekundáriu Jerál (ESJ) Finantil, Ai-mutin, Tersa ne’e.
Subvensaun públika ne’e ba atividade tolu hanesan apoiu ba estudante, dosente no atividade transversiál.
“Ministru Ensinu Superiór Siénsia no Kultura mak hatene tanba sá mak osan ne’e tama tarde. Ha’u lahatene, husu bá Ministru,” nia akresenta.
Notísia relevante : MESSK prepara milaun $2 ba programa subvensaun públika
Nia dehan, maski subvensaun públika seidauk transfere maibé atividade eskola nian kontinua la’o. Iha dosente permanente 50-resin, balun ne’ebé parte tempu nomós iha dosente insentivu.
Totál estudante hamutuk 4.000-resin, enkuantu fakuldade Saúde ho nia departamentu lima kompostu husi erfermajen, parteira, farmásia, nutrisaun no laboratóriu.
Alende ne’e, departamentu tolu iha ICS ne’ebé mak uluk baxarelatu agora sai ona ba lisensiatura. Hanesan departamentu parteira, farmásia no nutrisaun, ne’ebé aprovasaun ne’e iha Jullu nia laran.
Antes ne’e, Governu liuhusi Ministériu Ensinu Superiór Siénsia no Kultura (MESSK) liuhusi prepara millaun $2 ba programa subvensaun públika ba Institutu Ensinu Superiór (IES) iha Timor-Leste.
“Maibé ba tinan ne’e subvensaun ne’e ita prevee buat tolu de’it, ida ba estudante sira, fó formasaun ba ita-nia dosente no ajuda mós dosente sira,” Ministru Ensinu Superiór Siénsia no Kultura, José Honório da Costa Pereira Jerónimo, katak.
Governante ne’e husu ba IES atu submete ona relatóriu atu parte Ministériu bele distribui ona subvensaun públika.
“Universidade bele hatama relatóriu mai atubele fó subvensaun públika,” Ministru fó hanoin.
Jornalista : Osória Marques
Editora : Julia Chatarina
