Agrikultura Oekusi oferese manu-rade ba grupu agrikultór atu haki’ak iha Bobometo

OEKUSI, 13 Agostu 2025 (TATOLI) – Diresaun Rejionál ba Asuntu Agrikultura, Rejiaun Administrativa Espesiál Oekusi Ambeno (RAEOA), apoia manu-rade hamutuk 10 ba grupu agrikultór Baumnasi atu haki’ak iha aldeia Quibiselo suku Bobometo sub-rejiaun Oésilo.

Notísia relevante:Autoridade RAEOA haki’ak manu-rade hodi fornese ba programa merenda eskolár

Sekretária Rejionál ba Asuntu Agrikultura, Filomena Sila, informa katak, antes ne’e grupu referidu submete pedidu husu apoia, tanba iha membru na’in-12 iha inisiátiva di’ak atu haki’ak manu-rade, tanba iha planu ba futuru bele distribui manu-tolun ba programa merenda eskolár.

“Ami ami observa uluk kondisaun fatin no hahán atu haki’ak ne’e oinsá, ne’e mak ita mai apoia ho eskala ki’ik, fó uluk 10, maibé ami nafatin apoia mós hahán ba manu-rade nian, ohin ita haree fatin ladun luan, entaun ita rekomenda atu hadi’a tan, tanba ba futuru sei apoia baraktan ba grupu ne’e, tanba membru sira barak, no sira hakarak haki’ak atu iha futuru bele utiliza tolun hodi fornese fali ba programa merenda eskolár,” nia informa iha suku Bobometo, tersa ne’e.

Nia rekomenda, ba grupu Baumnasi ho nia membru grupu 12, presiza kria unidade, serbisu hamutuk, nune’e mellora ezisténsia grupu referidu atu kontinua kria tan atividade seluk.

“Ohin ami mós lori hela hahán balun, tanba grupu sira sei prepara hahán, tan ne’e hanesan responsabilidade, ita enkoraja sira atu labele hanoin polítika de’it maibé kontinua serbisu, hodi alarga tan ba atividade seluk hanesan rai no impresta osan, tanba atividade ortikultura sira hala’o ona hanesan kuda modo no haki’ak manu-rade,” nia apela.

Notísia relevante:Autoridade RAEOA oferese manu-rade 100 ba grupu komunidade iha Pante Makasar

Xefe Grupu Baumnasi, Pedro Cono, sente orgullu, maske apoia dahuluk 10 de’it, maibé promete sei hadi’a fatin, atu ba oin bele aumenta tan, tanba sei apoia mákina lu’ut manu-tolun nian hodi produs baraktan.

“Ami agradese tanba fulan kotuk ha’u hatama ami-nia surat ne’e ba agrikultura, ne’e mak ohin mai entrega, momentu ne’ebá ami husu barak maibé ohin fó de’it 10 mós ami kontente tanba responde duni, ne’ebé ohin ami rona ona rekomendasaun atu hadi’a fatin tanba ba oin sei aumenta barak tan, ne’ebé ami promete sei hadi’a tanba materiál sira-ne’e ami uza lokál hotu hanesan ai no tali, entaun ami sei esforsa atu prodús barak tan, tanba ba oin sei apoia mós mákina atu lu’ut manotolu,” nia orgullu.

Jornalista: Abílio Elo Nini

Editór: Rafael Ximenes de A. Belo