DILI, 14 Agostu 2025 (TATOLI)-Ministru Ensinu Superiór, Siénsia no Kultura (MESSK), José Honório da Costa Pereira Jerónimo, hatete governu prosesa hela subvensaun públika ba Institutu Ensinu Superiór (IES) tolu hanesan Universidade Orientál Timor-Leste, Universidade da Paz no Institutu João Saldanha.
“UNITAL ita atu atribui iha semana ne’e ka semana oin, UNPAZ tanba sira iha problema uituan iha tempu liu ba entaun governu tenke haree atu hadi’a, hafoin bele atribui”, dehan Ministru José Honório hatete ba TATOLI iha Balide, kinta-ne’e.
Ministru informa Institutu João Saldanha tinan ne’e sei la fó tanba sira nia ezekusaun seidauk to’o pursentu 80, tanba tuir dekretu lei ne’ebé iha tenke ezekuta to’o pursentu 80.
“Tanba ne’e ita seidauk bele atribui subvensaun públika ba sira. Tékniku sira bolu ona sira mai esplika ona ba sira nia subvensaun ne’ebé ita fó ajuda. Subvensaun públika ne’e atubele hadi’a sira-nia kualidade”, José Honório akresenta.
Membru Governu ne’e dehan ba sira-ne’ebé prenxe ona rekezitu hein semana ida-rua bele atribui ona.
Enkuantu osan ba subvensaun públika ne’ebé MESSK prepara ba Institutu Ensinu Superiór tinan ne’e hamutuk milaun $2, no IES iha territóriu hamutuk-19.
Notísia relevante: Reitór ICS seidauk simu subvensaun públika husi MESSK
Jornalista : Osória Marques
Editora : Rita Almeida
