DILI, 14 Agostu 2025 (TATOLI)-Diretór Nasionál Rekursu Umanu iha Ministériu Edukasaun (ME), João Amaral, hatete ME fó tempu loron-lima ba partisipante atu reklama valór sira molok taka-sai lista kandidatu ba públiku.
“Ida-ne’e nu’udar lista rezultadu provizóriu, tanba ministériu sei fó loron-lima husi data fó sai lista provizóriu ba partisipante teste atu reklama valór sira, nune’e lista finál ba lugár iha bolsa kandidatu sei omologa hosi ministra edukasaun ba públika iha jornál repúblika, hanesan prevee iha artigu 40 husi regulamentu rekrutamentu dosente”, dehan nia ba jornalista sira iha Vila Verde, kinta-ne’e.
Nia informa bolsa kandidatu Ensinu Sekundáriu Jerál no Ensinu Sekundáriu Tékniku Vokasionál (ESJ-ESTV), loke ba lugár 2.475 iha grupu rekrutamentu 12, konforme despasu ministeriál 10/2025, 21 Marsu (abertura konkursu bolsa kandidatu ensinu sekundáriu).
Husi lista provizóriu konkursu bolsa kandidatu, partisipante teste hamutuk 1095, kompostu husi feto 470 no mane iha 625 maka tama iha lugares bolsa, no lista eskluídu hamutuk 8384 tanba hetan valór menus husi 60.
Nune’e ba grupu rekrutamentu lian-portugés, tema literatura no kultura, partisipante teste hamutuk 114 mak hetan valór 60 ba leten no tama ba lugár bolsa ba lian-portugés, ba lian-tetun, partisipante teste hamutuk 21 mak hetan valór 60 ba leten no tama ba lugár língua-tetum, ba lian-inglés, partisipante teste hamutuk 40 mak hetan valór 60 ba leten no tama ba lugár lian-inglés.
Ba lian-malaiu, partisipante teste hamutuk na’in-hitu mak hetan valór 60 ba leten, istória jeografia no sidadania, partisipante hamutuk 73 mak hetan valór 60 no tama ba lugár grupu rekrutamentu ne’e.
Enkuantu ekónomia no métudu kuantitavu, partisipante hamutuk 221 maka hetan valór 60 no tama ba lugár, matemátika, partisipante hamutuk 20 mak hetan valór 60 no tama ba fízika no kímika, partisipante hamutuk 41 mak hetan valór 60 ba leten no tama ba lugár.
Portantu grupu rekrutamentu biolojia no jeolójia, partisipante teste hamutuk 160 mak hetan valór 60 ba leten mak tama, teknolojia multimedia no informátika partisipante teste hamutuk 258 maka hetan valór 60 ba leten no tama ba lugár, edukasaun fízika no desportu partisipante hamutuk na’in-tolu maka hetan valór 60 ba leten mak tama ba lugár, relijiau no morál, partisipante teste hamutuk 137 mak hetan valór 60 ba leten mak tama ba lugár.
“Ita mos iha eis manorin kontratadu tinan 2023 ne’ebé partisipanta teste espesiál, hamutuk 700 no sira ne’ebé klasifikadu iha na’in-313”, nia informa.
Bolsa kandidatu ba sekundáriu jerál no tékniku vokasionál grupu rekrutamentu-ualu mak la atinje ba alvu.
“Husi rezultadu teste referidu grupu rekrutamentu ualu mak la atinje alvu ne’ebé ministériu determina, no mós iha grupu rekrutamentu haat mak liu tiha alvu husi ministériu nian”, nia dehan.
Nia dehan bazeia ba previzaun nesesidade profesór iha futuru, ministériu edukasaun hola desizaun atu hatama hotu partisipante teste sira-ne’ebeé hetan valór 60 ba leten ba lugares bolsa kada grupu rekrutamentu.
Tanba ne’e mak ohin ME liuhosi nia diresaun rekursu umanu anúnsiu ba públiku kona-ba rezultadu seriasaun provizóriu husi teste elektrónika bolsa kandidatu ensinu sekundáriu jerál no ensinu tékniku vokasionál, ba grupu rekrutamentu sanulu resin rua.
Notísia relevante: Kandidatu bolsa ensinu sekundária barak falla iha teste
Jornalista : Osória Marques
Editora : Rita Almeida
