Laiha espasu, HNGV transfere pasiente balun baixa iha ospitál Lahane
DILI, 18 Agostu 2025 (TATOLI)—Diretór Servisu Apoiu Diagnostiku no Terapéutiku, Vidal de Jesus Lopes, informa daudaun ne’e HNGV laiha ona espasu ba pasiente sira, nune’e HNGV foti desizaun hodi transfere pasiente balun ba baixa iha Hospitál António Carvalho Lahane hodi hala’o tratamentu intensivu.
Notísia Relevante: Laiha espasu, HNGV kontinua transfere pasiente dengue ba Vera-Cruz
“Ita-nia kama hamutuk 425 to’o 450 maibé loro-loron pasiente nakonu hela de’it, ate akontese over load. La’ós ema kestiona mak ami foin foti desizaun no solusaun alternative, ami foti mak transferensia ba Lahane ne’e akontese hela. Agora dadauk, pasiente na’in-17 mak baixa iha Hospitál António Carvalho Lahane. Alternativa sira seluk mak bainhira nakonu demais mak ami deside pasiente kategoria kma’an, ami deside transfere ba Servisu Saúde Munisípiu Dili nian liuliu iha Sentru Saúde Vera-Kruz no Sentru Saúde Formoza,” Vidal de Jesus Lopes hateten ba Jornalista sira, iha nia kna’ar fatin, Bidau, ohin.
Nia informa, kona-ba akordu ho Sentru Saúde Munisípiu Dili ne’e la’o kle’ur ona kuaze tinan rua ona maibé Sentru Saúde Vera-Kruz no Sentru Saúde Formoza ne’e, pasiente sira nesesáriu liu mak ba provizoriamente no tama ona ba fulan hitu no ualu, HNGV transfere de’it ba Hospitál António Carvalho Lahane.
“Karantina Tasi-Tolu mós mamuk maibé ami la presiza to’o ne’eba. Ami tetu ba-mai labele to’o iha Karantina Tasi-Tolu, tanba kestaun tékniku ho kondisaun iha ne’ebá no distánsia mai HNGV dook demais. Bainhira presiza teste ruma ho urjente ka pasiente falla iha situasaun balun, distansia ne’e dook tebes. Ne’ebé, ami deside ba Lahane no alternativa seluk mak ba Formosa no Vera-Kruz banhira akontese Over Load,” nia informa.
Tuir nia, pasiente sira-ne’ebé transfere ba iha Hospitál António Carvalho Lahane, maiória moras pulmaun ka moras fuan nian mak sira halo transferénsia ba iha ne’ebá hodi simu tratamentu intensivu.
“Moras barak liu mak problema iha pulmaun, Infeksaun vias Respiratóriu, pasiente sira Tuberkuloze (TB) no Pneumonia, ida-ne’e mak barak liu. Agora dadauk sira na’in-17 mak iha ne’ebá, bainhira balun alta no balun ba nafatin, ne’ebé movimentu sempre la’o,” nia dehan.
Jornalista : Felicidade Ximenes
Editór : Cancio Ximenes
