DILI, 20 Agostu 2025 (TATOLI)-Komandante Supremu FALINTIL-Forsa Defeza Timor-Leste (F-FDTL), José Ramos-Horta, fó omenajen ba eroi liman kroat povu Timor nian ne’ebé la rende hodi fó buat hotu ba povu no Nasaun nia ukun rasik-án.
Prezidente Repúblika konvida ema hotu atu hanoin hikas sakrifisiu, dedikasaun ne’ebé aas-uain sira hatudu, to’o ohin loron barak mak seidauk hetan ninia ruin.
Hanesan diplomata desde rezisténsia, nia dehan admira ho elementu sira ne’ebé luta durante tinan-24. Luta ne’ebé diferente ho Nasaun sira seluk. Tanba eroi sira ne’ebé lidera funu laiha koñesimentu klean no formasaun ba militár maibé kontinua luta ba ukun rasik-án.
“Admira tebe-tebes ita-nia luta, admira erói sira hanesan Xanana, Taur Matan Ruak, Lere Anan Timur, sira ne’e lahatene bainhira mak luta ne’e ramata ho vitória, ou vitória iha duni ka-la’e, sira fiar vitória iha”, Prezidente Repúblika hato’o iha nia mensajen loron FALINTIL ba da-50 iha Palásiu Prezidente, foin lalais ne’e.
Xefe Estadu dehan sempre hanoin eroi sira hanesan Nicolau Lobato ne’ebé mate iha kombate. “Ita hanoin mós timoroan mane, feto, joven, ferik no katuas, kombatente no naun kombatente ne’ebé mate iha rai-laran”.
Nia hatutan ohin kompleta tinan 50 ezisténsia FALINTIL, hanoin hikas prosesu naruk, barak mak ran fakar no ruin naklekar to’o Nasaun hetan indepedénsia.
Notísia relevante: PR Horta: FALINTIL iha Timoroan tomak nia fuan no memória
Jornalista : Nelson de Sousa
Editora : Rita Almeida
