Asu pozitivu Raiva tata ema na’in-tolu iha Loes
DILI, 21 Agostu 2025 (TATOLI)—Diretór Servisu Saúde Munisípiu Liquiça, Luis Manuel Albino, informa asu ida pozitivu Raiva tata ema na’in-tolu iha área Loes, Likisa.
Notísia Relevante: Pasiente ida mate iha Ospitál Referál Maubisse tanba Raiva
“Loos duni, horisehik, asu tata ema na’in-tolu (3) no na’in-ida 1) mak grave, ami transfere kedas mai iha Hospitál Nasionál Guido Valadares. Na’in-rua halo tratamentu saúde iha Loes. Entaun, tuir informasaun husi laboratóriu katak asu ne’ebé mak ami foti nia amostra teste rezultadu pozitivu Raiva,” Luis Manuel Albino hateten ba jornalista sira, bainhira tuir Konsulta Finál ba Planu Estratéjia Nasionál Saúde Matan Timor-Leste nian 2026-2030, iha Timor Plaza, ohin.
Munisípiu Likisa halo ona pedidu mai iha nasionál atu distribui vasina anti Raiva ba Likisa, nune’e bele halo vasinasaun ba pasiente sira.
“Pasiente ne’ebé mak ami taransfere mai HNGv ne’e idade tinan tolu resin mak asu tata no grave. Nune’e, daudaun ne’e médiku sira fó atendemntu másimu ba pasiente ne’e,” nia esplika.
Nia informa, husi Janeiru mai to’o agora, asu tata ema hamutuk 56 no husi númeru ne’e iha asu rua mak pozitivu Raiva, tanba ne’e tratamentu ba sira kontinua la’o no vasina anti Raiva mós iha nasionál sufisiente, nune’e halo pedidu para sira bele halo distribuisaun.
“Durante ne’e, ami-nia sensibilizasaun ba komunidade kontinua la’o liuliu Prezidente Autoridade Administradór postu administrativu sira no xefe suku sira, halo enkontru no halo mós audiénsia públiku halo hotu ona. Maibé, komunidade mak seidauk iha konsiénsia atu bele hatán ba sasán sira ne’e. Maibé, ha’u hanoin, ami enkontru ho xefe suku sira orienta ona katak banhira asu ida tata ema, asu na’in tenke responsabiliza ba ema ne’e lori ba ospitál to’o ema ne’e mate mós nafatin responsabiliza. Entaun, ida-ne’e ameasa ida ba familia atu bele konsidera sirkulár sira-ne’ebé mak sai husi prezidente Autoridade,” nia dehan.
Nia dehan, horisehik asu tata ema na’in-tolu (3) ne’e akontese iha aldeia Kaibait, suku Uatuboro, postu administrativu Loes no munisípiu Likisa.
Iha fatin hanesan, Vise-Ministru Fortalesimentu Instituisiional Saúde, Jose dos Reis Magno, apela ba komunidade tenke asegura asu sira iha ida-idak nia fatin, nune’e labele fó risku ba ema seluk nia moris.
“Ita haree, daudaun ne’e ita-nia situasaun agora munisípiu neen mak iha risku mean mak hanesan RAEOA, Kovalima, Bobonaru, Ermera, Likisa no Manufahi. Agora, situasuan ne’e hatudu mai ita katak uluk fulan hirak liu ba situasaun iha munisípiu, parte rejiaun klaran sei livre hel. Maibé, sira mós infetadu ona, tanba ne’e husu ba animál-na’in sira tenke asegura asu sira-ne’e iha ida idak nia uma no labele fó risku ba ema seluk,” nia hateten.
Atu kontrola moras Raiva ne’e, nia hateten, la’ós saúde nia papel mesak maibé lina ministeriál sira hanesan Ministériu Agrikultura, Pekuária, Peska no Floresta (MAPPF) no ema hotu nia papel atu halo diseminasaun ba moras refere.
Entretantu, tuir dadus ne’ebé mak iha katak pasiente ne’ebé mate ba Raiva hamutuk 12 no husi ne’e RAEOA mate na’in-tolu (3), Covalima haat (4), Likisa ida (1), Bobonaro rua(2), Ermera ida (1)no Manufahi ema na’in-ida (1).
Notísia Relevante: OMS entrega ona vasina anti Raiva 1.000 ba INFPM
Jornalista : Felicidade Ximenes
Editór : Cancio Ximenes
