OMS entrega ona vasina anti Raiva 1.000 ba INFPM
DILI, 19 Agostu 2025 (TATOLI)—Diretór Gabinete Garantia Kualidade Institutu Nasionál Farmásia no Produtu Médiku (INFPM), Miguel de Padua Noronha, relata Organizasaun Mundiál Saúde (OMS) entrega ona vasina anti Raiva (RIG) hamutuk 1.000 ba INFPM, segunda (18 Agostu 2025) horisehik.
Notísia Relevante: Timor-Leste hetan apoiu doze vasina anti raiva husi Governu Indonézia
“Vasina anti Raiva ne’ebé ita uza iha ita-nia rain fahe ba kategoria rua, ida mak Var no ida seluk maka Rig. Agora daudaun ita iha ona vasina RIG estoke 1.000 iha ita-nia armajen sentrál no Vasina anti Raivaa hamutuk 463, ne’ebé agora daudaun ita fornese hela hodi hatán ba pedidu sira husi fasilidade saúde sira. Liuliu ida-ne’e iha munisípiu viziñu sira iha área fronteira sira hanesan Bobonaru, Kovalima, Ermera no RAEOA,” Miguel de Padua hateten ba jornalista sira, ohin.
Nia relata, vasina anti Raiva hamutuk 2.000 ne’ebé apoia husi Indonézia ne’e, agora daudaun iha de’it hamutuk 463, tanba distribui ona ba fasilidade saúde sira iha área afetadu moras Raiva.
“Husu ba sentru saúde sira-ne’ebé esperiénsia kazu Raiva iha sira-nia áream atu hato’o pedidu ba INFPM hodi halo distribuisaun ai-moruk ba área afetadu sira,” nia konklui.
Notísia Relevante: Aban, vasina antí Raiva vial 200 husi Austrália to’o iha TL
Jornalista : Felicidade Ximenes
Editór : Cancio Ximenes
