DILI, 25 Jullu 2025 (TATOLI) – Governu Indonézia fó doze vasina anti-raiva hamutuk 2.000 ba Timor-Leste hodi ajuda prevene moras raiva (rabies) iha komunidade timoroan sira.
“Haksolok ba ami, lori Governu Indonézia no povu Indonézia nia naran, fó sai katak loron rua liubá ami distribui ona vasina anti rabies ho doze hamutuk 2.000 hodi ajuda prevene moras rabies iha Timor-Leste,” Enkarregada Asuntu Embaixada nian iha Indonézia, Bangang Malewa dehan, iha komemorasaun Loron Nasionál Saúde iha BJ Habibie, Bidau Santana,ohin.
Enkarregadu ne’e subliña, vasina ne’e utiliza ba ema no fornese hela husi povu Indonézia ba povu Timor-Leste tanba povu nasaun rua hanesan maun-alin ne’ebé haketak husi istória.
“Tanba ne’e, saida maka akontese iha Timor-Leste hanesan mós todan ida ba ita-nia maun-alin sira iha Indonézia. Emerjénsia raiva nian ne’ebé esperiénsia iha loron hirak liubá iha Timor-Leste, iha ne’ebé ema na’in-hitu ka ualu-resin maka mate ona tanba asu tata, sai duni preokupante tebes tanba bainhira la halo tratamentu lalais,” nia hateten.
Enkarregada Asuntu Embaixada mós hato’o agradesimentu ba Ministériu Saúde no OMS ne’ebé fasilita ona preparasaun no entrega vasina iha Kupang iha loron ida hafoin pedidu.
“Ko0perasaun di’ak entre ami ne’e hanesan manifestasaun konkreta ida husi ami-nia solidariedade no maun-alin hodi ultrapasa eventu estraordináriu ne’e”, nia esplika.
Nia hato’o nia esperansa katak kolaborasaun entre Indonézia no Timor-Leste sei la’ós de’it relasiona ho prevensaun raiva maibé mós iha setór oioin seluk, inklui hadi’a no hametin ekonomia.
“Espera katak, doasaun vasina kontra anti raiva ne’e la’ós de’it haree hanesan merkadoria ida, maibé mós hanesan símbolu ida husi maun-alin besik entre Indonézia ho Timor Leste. Ne’e hatudu kuidadu, kompaixaun, no solidariedade entre ita-nia povu. Moras raiva ne’e bele prevene, maibé só bainhira ita atua ho di’ak no hamutuk,” Enkarregada Asuntu Embaixada nian iha Indonézia Bangang Malewa espera.
Vasina ida-idak ne’ebé distribui husi Indonézia nu’udar pasu ida atu salva vida ida, labarik ida, inan-aman ida, no komunidade doben Timor-Leste.
Iha fatin hanesan, Vise-Ministru Saúde ba Fortalesimentu no Instituisionál Saúde, José dos Reis Magno, hato’o agradesimentu ba apoiu ne’ebé iha no hato’o nia esperansa katak relasaun kooperativa entre Indonézia ho Timor-Leste sei la bazeia ba apoiu vasina, maibé bazeia ba maun-alin.
“Ita-nia relasaun kolaborativu, Indonézia apoia fali ita ho vasina anti raiva hamutuk 2.000 ba Timor-Leste,” José dos Reis Magno afirma.
Governante ne’e esplika, Diretór Nasionál Polítika Kooperasaun Narsicio Fernandes mak sai sasin ba eventu importante ida-ne’e iha Kupang, entaun eventu ida ne’ebé apropriadu maibé Indonézia sempre sai nafatin maun-alin, tanba fahe fronteira rai-maran no tasi nian.
Vise-Ministru Saúde mós hato’o agradese no saudasaun ba Ministru Saúde Indonézia no Embaixadór Indonézia iha Dili ba apoiu ne’ebé sira fó.
Notísia relevante: https://tatoli.tl/2025/07/01/oms-garante-fornesimentu-adekuadu-vasina-rabies-ba-populasaun-tl/
Jornalista : Felicidade Ximenes
Editór: Rafael Ximenes de A. Belo
