IPK iha Jullu rejista inflasaun sa’e 0,2%
DILI, 21 Agostu 2025 (TATOLI)–Ministériu Finansa liuhusi Institutu Nasionál Estatístika Timor-Leste (INETL) rejista Índise Presu Konsumidór (IPK) ba fulan-Jullu, husi grupu hotu sa’e +0,2% kompara ho fulan-Juñu 2025 sa’e +0,1%.
Tuir dokumentu INETL hatudu katak, mudansa presu grupu hotu sa’e +0,2% tanba hetan kontribuisaun husi grupu hahán no bebida la’ós alkoólika sa’e +0,7%, transporte sa’e +0,4% no ekipamentu no manutensaun mobiláriu uma-laran sa’e +0,1%.
“Ba grupu alkoól no tabaku tun -2,1%, hatais no sapatu -0,5% no komunikasaun -0,2% ida-ne’e sai hanesan mudansa kontrariu ba inflasaun grupu hotu mensál,” referidu nota ne’ebé Ajénsia Tatoli asesu, Kinta ne’e.
Kona-ba grupu hahán no bebida la’ós alkoólika sa’e +0,7% tanba hetan impaktu maioria husi sub grupu modo tahan +1,8%, fo’os +0,9%, ai-fuan +1,2%, mina no bokur tun -0,5% no komunikasaun tun -0,2%.
INETL fó sai, mudansa persentajen IPK anuál sa’e +0,3% kompara entre Jullu 2025 ho Jullu 2024 hetan kontribuisaun husi grupu hahán no bebida la’ós alkoólika sa’e +1,1%, edukasaun sa’e +0,4%.
Notísia relevante : IPK iha Maiu rejista deflasaun 0,2%
Nune’e, ekipamentu no manutensaun mobiláriu uma-laran sa’e +0,8%, hatais no sapatu sa’e +0,5%, uma sa’e +0,4% no rekreasaun no kultura sa’e +0,4% ba anuál Jullu 2025. Ba grupu transporte nian tun -1,0%, alkoól no tabaku tun -3,2% no komunikasaun -1,1% ne’e sai hanesan mudansa kontráriu ba inflasaun grupu hotu ba anuál Jullu 2025.
Aleinde ne’e, kona-ba inflasaun tradeable sa’e +0,2% no non-tradeable sa’e mós +0,2% iha mensál, kompara entre Jullu 2025 ho Juñu 2025. Inflasaun Tradeable sa’e +0,3% no non-tradeable sa’e mós +0,5% iha anuál, kompara entre Jullu 2025 ho Jullu 2024.
Jornalista : Arminda Fonseca
Editora : Julia Chatarina
