DILI, 22 Agostu 2025 (TATOLK)—Prezidente Bee Timor-Leste, Empreza Públiku (BTL, E.P), Gustavo da Cruz, hateten ekipa tékniku BTL sei halo levantamentu dadus ba prosesu perfurasaun bee- moos iha suku Kamea, postu Kristu Rei, munisípiu Dili.
Notísia Relevante: Inan-feton sira iha Bekora, Bebonuk, Kuluhun no Tasi-tolu halerik ba bee-moos
Nia hatutan, komunidade ne’ebé asesu bee-moos iha kapitál Dili, públiku rasik sente hela iha mudansa signifikante ne’ebé akontese durante ne’e, maibé balun mak seidauk asesu bee-moos ho di’ak.
“Iha parte Kamea nian iha aldeia rua (2) mak seidauk asesu ba bee-moos, maibé ami haree hela situasaun ida-ne’e no ami-nia enjiñeiru sira halo hela levantamentu tékniku. Entaun, ita iha rekursu bee ne’ebé sei halo perfurasaun husi instituisaun balun no sei halo hela teste bee hodi kanaliza ba área referida,” Prezidente BTL, E.P ne’e informa ba jornalista sira iha nia kna’ar fatin Kaikoli, ohin.
Jeralmente, nia dehan, iha suku Bekora hahú husi Kuluhun to’o terminál Bekora ne’e tanba relasiona ho prosesu alargamentu estrada, maibé sira koordena ho kompañia Montana Di’ak hodi muda kanalizasaun sira ho di’ak, nune’e komunidade bele kontinua asesu bee-moos no sira sei esforsu halo melloramentu ba kanalizasaun bee.
“Ha’u hanoin iha munisípiu Dili área ne’ebé komunidade seidauk asesu bee moos mak iha parte Tasi-tolu, Kamea, Lahane Orientál, Taibesi Aituri-Laran no mós iha parte Manleuana nian,” nia hateten.
Tamba ne’e, tuir nia, iha fulan neen ikus ne’e Bee Timor-Leste, Empreza Públiku halo intervensaun sira iha área sira-ne’ebé mak durante ne’e komunidade halerik ba bee moos, sira hahú mellora no iha rezultadu pozitivu.
Tanba, nia hateten, iha mós promisaun servisu hamutuk ho lideransa komunitária, tantu konsumidór sira ba atendementu ne’ebé mak oras ne’e daudaun BTL halo hela aproximasaun.
“Tanba ne’e, ami iha esperansa nafatin iha kapitál Dili laran no iha tinan ida-ne’e sira bele halo di’ak liután kompara ho tinan hirak ba kotuk ne’e,” nia haktuir.
Nia informa, liga fali ba parte Lahane Orientál liuliu iha área Aituri-Laran no Suhurama ne’e, oras ne’e daudaun BTL halo hela intervensaun iha ne’ebá.
Hein katak, iha fulan ida ka rua sistema bele normaliza no komunidade bele asesu bee moos, maibé sira sei kontinua nafatin tau-matan ba área ne’ebé durante ne’e sofre ba bee-moos.
“Iha sorin seluk, ami identifika hela no oras ne’e daudaun ekipa BTL halo hela intervensaun iha Manleuana, ba aldeia tolu ne’ebé durante ne’e la asesu bee-moos. Maibé, agora bee la’o normál, nune’e ekipa BTL mós nafatin esforsu hodi hadi’a kanalizasaun sira,” nia dehan.
Aleinde ne’e, iha aldeia Kakeu Laran tun to’o Bekusi nian ne’e, kuaze komunidade mak uza bee perfurasaun (bomba) maske bee ne’ebé ekipa BTL estabelese la’o normál hela.
Ho nune’e, BTL sei halo intervensaun ba komunidade ne’ebé uza Sanyo ne’e sei tesi hotu kanu hodi troka fali kanalizasaun ba kuantidade bee ne’ebé mak di’ak, nune’e ema hotu bele asesu tuir oráriu distribuisaun ne’ebé sei halo husi BTL rasik.
“Tanba ne’e, husu ba komunidade labele estraga sistema knalizasaun bainhira ekipa BTL halo ona instalasaun ba kontadór. Husu atu koopera ho BTL atu halo servisu ho di’ak, nune’e bele kontinua halo intervensaun ba área sira seluk,” nia apela.
Tuir planu, bainhira finaliza ona distribuisaun bee-moos ba área ne’ebé afetadu ne’ebé komunidade halerik ba bee-moos, BTL sei kontinua mellora distribuisaun bee-moos iha área Palapasu.
Notísia Relevante: Deputadu Kalohan husu BTL, E.P tau atensaun ba komunidade halerik ba bee-moos
Jornalista : Alexandra da Costa
Editór : Cancio Ximenes
