PNTL submete ona kazu sidadaun Indonézia ne’ebé mate iha Fatumea
DILI, 22 Agostu 2025 (TATOLI)-Portavós Komandu Jerál Polísia Nasionál Timor-Leste (PNTL), Superintendente Polísia João Belo dos Reis, hateten PNTL submete ona auto-notísia konaba kazu sidadaun Indonézia ne’ebé mate iha fronteira Fatumea ba Ministériu Públiku.
Albel Tinos Bere mate iha aldeia Bee Lulik Kraik, suku Bee Lulik Leten, postu administrativu Fatumea, munisípiu Kovalima.
“Hakarak informa ba maluk sira katak prosesu ba kazu ne’e, Diresaun Investigsaun Kriminál rejista ona iha Ministeriu Públiku ho númeru NUC 0272/ 2025 PNSIK”, João Belo ba jornalista sira iha nia kna’ar fatin Komandu Jerál PNTL Kaikoli, sesta-ne’e.
Belo haktuir Bere hetan tiru husi kilat manu (senapan angin). PNTL sei la halo konkluzaun konaba ema Timor ka ema Indonézia mak tiru. “Kazu ne’e segredu justisa, ha’u labele ko’alia buat-ida”, nia afirma.
Nia hatutan ekipa konjunta mak halo investigasaun. “Informa ba públiku katak prosesu ne’e investigasaun la’o hela, autoridade nasaun rua kontinua servisu hamutuk, horiseik adidu seguransa no defeza husi Indonézia mai hasoru sua-eselénsia Komandante Jerál PNTL”.
Ho akontesimentu ne’e, nia dehan situasaun iha fronteira hakmatek no kontroladu. “Ita-nia UPF halo servisu maka’as iha ne’ebá, liña fronteira kontroladu, autoridade nasionál komunika ba malu hodi bele buka solusaun ba problema ne’e”.
Albel Tinos iha loron 16 fulan-Agostu kalan, ho kolega hamutuk na’in-20 ultrapasa fronteira mai área Bee Lulik Kraik, suku Bee Lulik Leten, postu administrativu Fatumea, munisípiu Kovalima hodi kasa animál fuik.
Hafoin akontesimentu, iha loron 17 fulan-Agustu 2025 dadeer, parte família matebian mak lori kedas mate-isin hodi hakat bá Indonézia.
Matebian tiru mate iha área akontesimentu kilometru 18 husi postu UPF nian.
Notísia relevante: PNTL investiga ona kazu sidadaun Indonézia ne’ebé mate iha fronteira
Jornalista : Natalino Costa
Editora : Rita Almeida
