SEKOMS-Mídia Nasionál diskute halo kobertura ba TL nia adezaun ba ASEAN
DILI, 22 Agostu 2025 (TATOLI)–Governu liuhusi Sekretariu Estadu Komunikasaun Sosiál (SEKOMS), Expedito Dias Ximenes, sesta ne’e, iha Palásiu Governu Dili, hala’o reuniaun ho jerente mídia nasaionál neen (6) iha Timor-Leste hodi ko’alia kona-ba oinsá hala’o kobertura iha serimonia adezaun Timor-Leste ba ASEAN iha Malázia iha loron 26 Outubru mai ne’e.
Notísia Relevante: Malázia kontinua apoiu Timor-Leste nia adezaun ba ASEAN
Mídia nasionál ne’ebé hala’o enkontru ho SEKOMS mak hanesan Radiu Telivizaun Timor-Leste, Empreza Públika (RTTL, E.P), Agência Notisiosa de Timor-Leste, Institutu Públiku (TATOLI, IP), Media OneTimor, STL, SMNEWS no Grupu Media Nasionál (GMN).
“Enkontru, ho mídia konvensionál balun, plataforma balun atu ko’alia kona-ba preparativu delegasaun mídia nian atu ba halo kobertura iha serimónia adezaun Timor-Leste nian ba ASEAN ne’ebé hala’o fulan-Outubru mai ne’e iha Malázia,” Expedito hateten ba jornalista sira hafoin reuniaun ramata.
Governante ne’e dehan, reuniaun ne’e hanesan parte primeiru hodi roma mídia sira-nia hanoin oinsá mak preparasaun hanesan mídia Timor-Leste prepara-aan hodi hola parte iha serimónia referida.
“Iha reuniaun ne’e, ha’u mós husu ba sira atu halo diseminasaun kona-ba benefisiu Timor-Leste sai membru plenu ASEAN, entaun sira hotu konkorda katak hahú fulan-Setembru ne’e, sira bele halo ona sensibilizasaun iha sira ida-idak nia mídia kona-ba benefisiu bainhira Timor-Leste sai membru plenu ASEAN,” nia dehan.
Entretantu, nídia estatál TATOLI no RTTL, no GMN prontu ona atu halo produsaun pakote no programa espesiál hodi konvida membru Governu sira ko’alia kona-ba vantajen Timor-Leste sai nu’udar membru plenu ASEAN.
Iha fatin hanesan, Prezidente Ajénsia Notisioza TATOLI, I.P, Noemio Mateus Soares Falcão, hato’o agradesementu ba SEKOMS ne’ebé halo kooperasaun ho mídia sira espesiálmente TATOLI bele partisipa hodi halo kobertura iha serimónia adezaun Timor-Leste ba ASEAN.
“Agradese ba SEKOMS tanba bele koopera ona ho mídia nasionál hotu espesiálmente TATOLI bele envolve hodi halo kobertura iha serimónia Timor-Leste nia adezaun ba ASEAN, tanba papél mídia importante tebes oinsá mak bele fó sai informasaun hotu iha simeira ne’,e tanba simeira ne’e rasik espesiál ba Timor-Leste,” Prezidente TATOLI dehan.
Notísia Relevante: Timor-Leste kuaze prienxe ona kritéria hitu atu adere ba ASEAN
Jornalista : Hortencio Sanchez
Editór : Cancio Ximenes
