DILI, 22 Agostu 2025 (TATOLI)–Sekretáriu Estadu Asuntu Toponímia Organizasaun Urbanu, Germano Santa Brites Dias, apela ba komunidade ne’ebé nia uma ekipa konjunta tau ona markasaun, atu prepara-an tanba antes ne’e fó ona notifikasaun.
“Ita-boot sira-nia uma ne’ebé tau ona markasaun ne’e, hotu-hotu tenke prepara-an no muda ona imi-nia sasán ba. Komunidade tenke hatene kuandu Governu tau ona markasaun iha ne’ebá, mak labele inventa tan, inventa ne’e ninia problema, ami halo serbisu de’it,” Sekretáriu Estadu Gemano hato’o ba jornalista sira, iha Sentru Juveníl Taibesi, Sesta ne’e.
Notísia relevante : Kaleidoskópiu 2024: Bainhira mak SEATOU muda sai uma kain 424 okupa Tasi-Tolu?
Ekipa konjunta tau ona marakasaun ba uma identifikadu iha área Tasi-Tolu, Embaixada Koreia nia kotuk, iha Ministériu Finansa oin (Aitarak-laran) no fatin seluk tan iha Dili laran.
“Ita hein hela orientasaun husi Ministériu Administrasaun Estatál, Terra no Propriedade no Ministériu Obra Públika, ami hein de’it. Se ohin no aban mak iha ona despaisu mak ami tun kedas, bele ohin, aban, semana oin ka fulan oin. Importante mak ita prepara, liuliu ba fatin ne’ebé identifikadu,” nia katak.
Governante ne’e dehan, ekipa konjunta seidauk iha data loloos atu halo despeju administrativu ba uma 424 iha Tasi-tolu ne’ebé antes ne’e tau ona markasaun.
Antes ne’e, Governu husu okupante atu hamamuk fatin identifikadu iha Tasi-tolu, hahú loron 11 to’o 15 Jullu 2024, maibé to’o agora seidauk ezekuta tanba presiza koordena serbisu.
Jornalista : Osória Marques
Editora : Julia Chatarina
