DILI, 25 Agostu 2025 (TATOLI)—Ministru Administrasaun Estatál, Tomás Cabral, husu ba Administradór postu administrativu sira iha munisípiu Bobonaru atu halo kontrolu ba lixu iha dalan portokolu.
“Husu ba Administradór postu Atabae no Balibo orienta Xefe suku no komunidade halo limpeza jerál, hamoos no hili foer iha tasi-ibun sira ne’ebé komunidade soe arbiru, tau iha lixu fatin no sunu,” Ministru Cabral hato’ó ba jornalista sira, iha ámbitu entrega karreta ba Administrasaun munisípiu Bobonaru, iha resintu edifísiu Ministériu Administrasaun Estatál (MAE), Kaikoli, Segunda ne’e.
Governante ne’e dehan, kamioneta ne’ebé entrega ona ba Administradór postu sira tenke utiliza ho másimu hodi halo serbisu ho másimu nune’e bele kontribui ba ambiente moos, saudável no ijiene.
“Kamioneta ida-ne’e serbisu hamutuk ho jestaun merkadu no servisu munisípiu nian atu kontrolu raut foer iha dalan protokulu ne’ebé komunidade prodús soe iha dalan públiku, rekolla hotu tau iha karreta lori ba tau iha lixu fatin,” nia katak..
Prezidente Autoridade Munisípiu (PAM) interinu Bobonaru, Celestino Marques, hateten, lixu namkari hahú husi Balibo to’o Batugade ne’e barak tebes.
“Entaun, esforsu autoridade nian mak ita sei halo avizu no sensibilizasaun nune’e lixu tenke tau iha nia fatin. Depois atu redús lixu mak AMB sosa kamioneta hodi tula lixu. Ikus ne’e ita sei halo programa hodi konvoka enkontru hodi funsionáriu halo limpeza ba kapitál Bobonaru,” PAM interinu tenik.
Jornalista : Osória Marques
Editora : Julia Chatarina
