DILI, 28 Agostu 2025 (TATOLI)—Institutu Formasaun Dosente no Profesionál Edukasaun (INFORDEPE) konsege fasilita ona formasaun ba manorin hamutuk 400 husi munisípiu neen, ne’ebé rekrutadu husi programa bolsa kandidatu.
“Dadus ne’ebé mai husi tinan kotuk, ba bolsa kandidatu ami konsege kapasita sira totál 400, husi munisípiu neen. Tinan ne’e, ami prepara hela atu kapasita nafatin bolsa kandidatu sira ne’ebé daudaun hanorin hela iha munisípiu, ita nafatin fó formasaun espesiál ida ba sira,” Prezidente INFORDEPE, Domingos Martins, informa ba jornalista sira, iha salaun Ian Martin, Kinta ne’e.
Notísia relevante : INFORDEPE fó formasaun ba dirijente Ensinu Báziku sira iha Oekusi
INFORDEPE iha fulan-Setembru ne’e, sei reiliza tan formasaun referidu, ba manorin hamutuk 600-resin ne’ebé hanorin iha ensinu báziku no antes ne’e kolokadu ona iha eskola sira iha territóriu.
Aleinde ne’e, kapasita ona manorin 300-resin husi pre-eskolár.
Nune’e mós, grupu manorin 187 ne’ebé agora prepara atu halo kolokasaun ne’e sei halo formasaun ba sira.
“Konteúdu ba matéria formasaun referidu hanesan formasaun fraternidade umana, pedagojia, kurríkulu, administrasaun eskolár inklui mos lejislasaun, mak sai hanesan pontu importante INFORDEPE hodi partilla ba manorin bolsa kandidatu foun sira,” Prezidente institutu katak.
Mentór lokál no mentór munisipál sempre iha liña frente atu fasilita formasaun kontinuidade ba manorin sira iha saladeaula.
INFODEPE nia planu hakarak fasilita formasaun ba manorin hotu, maibé dezafiu ne’ebé sira enfrenta mak menus rekursu umanu ba formadór nomós finanseiru, ho asuntu referidu institutu buka maneira halo formasaun prezensiál ka offline no formasaun distánsia ka online.
Jornalista : Osória Marques
Editora : Julia Chatarina
