DILI, 29 Agostu 2025 (TATOLI)—Ministru Obra Públika (MOP), Samuel Marçal, informa prosesu konstrusaun estrada iha munisípiu Ermera sei hein hela revizaun husi Komisaun Nasionál Aprovizionamentu (CNA, sigla portugés) hodi avalia antes hakat ba prosesu aprovizionamentu.
Notísia Relevante: MOP sei kontinua reabilita estrada iha Bobonaru-Ermera-Likisa
“Ha’u lakohi ona temi data prosesu ne’e la’ós ha’u mesak de’it. Tanba, se lae, públiku dehan ministru ne’e kaben boot. Tanba ne’e, prosesu uza osan povu nian ne’e la’o tuir burokrásia etapa ba etapa, katak husi diresaun ida ba diresaun ida, bainhira konklui hotu mak foin finaliza. Espera iha tempu ne’ebé badak bele hahú lansa,” Governante ne’e hateten ba jornalista sira iha nia kna’ar fatin, Kaikoli, ohin.
Importante liu, nia dehan, kolaborasaun ho povu sira iha ne’ebá, labele hakarak hadi’a estrada depois ekipamentu pozadu hanesan Loder, Eskavatór atu kee kafé hun ida mós presiza hakilar povu tomak hodi rona.
“Estrada ne’e Governu nia dever sei halo no tempu badak sei lansa. Maibé komunidade nia uma tatis sai mai estrada ibun, kuda kafé tama to’o estrada ibun ne’e, kuandu tratór boot atu sobu ne’e, favór ida koopera tanbá estrada ne’e ita hotu mak uza,” nia apela.
Aleinde ne’e, kona-ba prosesu konstrusaun iha munisípiu tolu hanesan Likisa, Ermera no Bobonaru nia prosesu kle’ur ne’e, la’ós tanba Governu mak lakohi halo ka toba hela ne’e lae, maibé Timor-Leste nia lei no sistema mak ezije duni tempu ne’e hanesan ne’e,
“Ha’u husu ba ema hotu atu komprende tanba iha Governu no iha lei mak buat sira-ne’e hotu sai benefísiu ba Estadu. Estadu ida forte bainhira lei ne’e forte, no lei ne’e forte bainhira ita kumpre. Katak, hotu-hotu tenke komprende buat hotu la’o hela ho prosesu,” nia hateten.
Tanba iha programa Governu ida-ne’e, Primeiru Ministru orienta ona ba nia hodi haree kestaun sira-ne’e sai prioridade boot ba povu, tenke komprende kle’an katak tinan hirak liubá kotuk Governu ladun halo infraestrutura hanesan ponte barak mak naksobu, estrada barak kotu, maibé la’ós Governu atu hadi’a buat hotu iha loron ida de’it ne’e, la posivél.
Notísia Relevante: MOP: Estrada dirasaun Gleno-Letefoho-Ermera Lama iha hela prosesu dezeñu
Jornalista : Alexandra da Costa
Editór : Cancio Ximenes
