DILI, 30 Jullu 2025 (TATOLI)—Governu liuhusi reuniaun Konsellu Ministru, kuarta ne’e, aprova proposta kona-ba reabilitasaun infraestrutura rodoviária (estrada) nasionál no urbana iha munisípiu Bobonaro, Ermera no Líkisa.
Tanba ne’e, Konsellu Ministru delibera atu autoriza despeza no abertura ba ninia prosedimentu aprovizionamentu hodi halo ezekusaun ba projetu reabilitasaun infraestrutura rodoviária haat.
“Ohin, Konsellu Ministru mós halo aprovasaun infranstrutura estrada nian ne’ebé fahe ba pakote haat (4) hanesan estrada nasionál rua (2), estrada munisipál ida (1) no estrada urbana ida (1). Entaun, ohin, Konsellu Ministru halo aprovasaun no ita hein de’it katak iha semana oin mak hetan ona deliberasaun husi Konsellu Ministru, hafoin haruka imediatamente ba iha Komisaun Nasionál Aprovizionamentu (CNA) hodi hahú prosesu konkursu públiku,” Ministru Obra Públika, Samuel Marçal, informa ba jornalista sira iha Palásiu Governu.
Governante ne’e haktuir, estrada hirak ne’e kondisaun grave tebe-tebes tanba ne’e mak Governu da-sia ne’ebé liuhusi orientasaun Primeiru-Ministru nian, atu fó prioridade ba estrada sira-ne’ebé ligasaun husi munisípiu ba munisípiu no munisípiu ba nasionál, nune’e fasilita komunidade halo movimentu no lori produtu lokál ba faan iha merkadu.
“Tamba ne’e, ha’u hato’o parabéns ba komunidade iha área ne’ebá, hein katak ita hahú konkursu públiku no bele prosesu iha tinan ida-ne’e nia laran. Entaun, tinan oin, ita buka para hahú asina kontratu ba empreza sira hodi implementa obra,” nia dehan.
Projetu reabilitasaun infraestrutura rodoviária haat ne’e mak hanesan reabilitasaun ba Estrada Nasionál, iha seksaun entre kruzamentu Lourba (Bobonaru), Atsabe no kruzamentu Letefoho (Ermera), ho naruk 48,93 km no kustu ne’ebé prevee millaun $47,9; Reabilitasaun ba Estrada Nasionál, iha seksaun entre Maliana, Kailaku no Ponte Marobo (Munisípiu Bobonaru), ho naruk 26 km no kustu ne’ebé prevee millaun $25,6
Reabilitasaun Estrada Munisipál, iha seksaun entre kruzamentu Bobonaru no Lolotoe Vila, ho naruk 8,9 km no kustu ne’ebé prevee millaun $13,8; Reabilitasaun ba Estrada Urbana Likisá, ho naruk 20 km no kustu ne’ebé prevee millaun $19,8.
Aleinde ne’e, Governu mós fó instrusaun ba Komisaun Nasionál Aprovizionamentu (CNA) hodi hahú etapa sira tuir mai husi prosedimentus kontratasaun públika nian, tuir lejizlasaun ne’ebé vigora.
Jornalista : Alexandra da Costa
Editór : Cancio Ximenes
