KOVALIMA, 01 Agostu 2025 (TATOLI)-Prezidente Autoridade Munisípiu Kovalima, Miguel Armada Cardoso, hateten sei kontinua fó prioridade ba dezenvolvimentu infraestrutura báziku iha Kovalima.
“Ko’alia kona-ba infraestrutura ita halo dezenvolvimentu báziku sira ne’ebé fó prióridade iha kategória tolu mak hanesan, grande projetu fundu infraestrutura bo’ot ne’ebé responsabiliza husi MAE no MPIE, tau bronjon iha mota mola no IGE normaliza estrada iha bee mean,” nia hateten ba jornalista sira iha Kovalima.
Notísia Relevante :MPIE diskute ho autoridade postu kona-ba elaborasaun PMOT iha Suai
Projetu konstrusaun estrada husi parte Kasa munisípiu Ainaru to’o Zumalai munisípiu Kovalima, sei hahú iha setembru nia laran tanba daudaun ne’e, tau ona fatuk dahuluk no mós projetu auto estrada hahú iha Zumalai to’o iha Natarbora munisípiu Manatutu.
Iha planu dezenvolvimentu munisipal (PDM) Kovalima ba tinan 2025 iha projetu 20. Enkuantu, Iha 2024 ne’e implementa projetu sira hanesan konstrusaun laboratóriu, irigasaun iha Tashilin no mós iha projetu sira seluk tan.
“Ha’u mai ho ha’u nia vizaun rasik, vizaun PAM atu halo atendimentu ne’ebé fasil, lais no amigavel, tempu uluk imi sei forma kle’ur, daudaun la uza ona, karta ruma ha’u atu asina iha estrada mos ha’u sei asina, ida ne’e hatudu atendimentu ne’ebé maka ho hadomi,” nia dehan.
Misaun hosi Servisu PAM Kovalima nian maka kria plataforma planu ba dezenvolvimentu entidade sira, asegura estabilidade no amizade komunidade nian, no envolve edukasaun, saúde inkluzaun sosiál no meiu ambiente, joventude, desportu, kultura no patrimoniál.
“Ha’u nia mandatu, haree ba iha setór agrikultura nian, atu kria kondisaun ba ita-boot sira, hanesan irigasaun iha metru 800 ne’ebé maka seidauk ramata, se remata ona ha’u fiar Zumalai parte Beilaku bele koilleta ona hare kulit,” tenik tan.
Notísia Relevante :Konstrusaun uma 63 ba família afetadu aeroportu Suai atinje ona 21%
Tuir dadus Sentru Tratór Sanfuk Kovalima iha tratór boot hamutuk 31 hodi fó apoiu fila rai agrikultor sira-nia hodi hasa’e produsaun agrikola no mós hand tratór hamutuk 30.
Jornalista: Celestina Teles
Editór: Florencio Miranda Ximenes
