DILI, 02 Setembru 2025 (TATOLI)—Ekipa jurídika iha Ministériu Justisa (MJ) prepara hela ezbosu rejime jurídiku foun kona-ba titularidade rai, nune’e tempu badak sei aprezenta iha reuniaun ezekutivu hodi hetan apresiasaun no aprovasaun.
Ministru Justisa, Sergio Hornai hateten, rejime jurídiku ne’e ho objetivu atu regula di’ak liután domíniu privadu no dominu públiku iha futuru.
“Aban ka bain rua ha’u sei hato’o tan iha iha Konsellu Ministru, ha’u hateten nafatin kona-ba rejime jurídiku ba domíniu privadu estadu no domíniu públiku estadu hodi halo aprovasaun iha Konsellu Ministru,” Ministru hato’o ba jornalista sira, iha Palásiu Prezidensiál, Bairru-Pité, Tersa ne’e.
Notísia relevante : Prezidente Komisaun D nota lei rai no eletrisidade sai preokupasaun ba investidór
Governante ne’e dehan, ba asuntu ne’e MJ mós simu ona pareser husi Ministériu Planeamentu, no Investimentu Estrátéjiku, Ministeriu Administrasaun Estatál no Kámara Komérsiu Indústria Timor-Leste no halo ona konsultasaun públika ho sosiedade sivíl hodi fó advokasia direitu rai no instituisaun nakait sira seluk.
“Dekretu-Lei rejime juridíku ba domíniu públiku estadu, lei domíniu privadu ho estadu ne’e ha’u bele hateten katak iha ona faze finál,” nia katak.
Governante ne’e rekoñese, lei rai ezisténte difísil atu kompleta sidadaun nia hakarak.
“Tanba ne’e presiza iha instrumentu legál balun nune’e ba oin bainhira implementa karik bele tuir sosiedade nia hakarak,” nia tenik.
Ministru hatutan, lei rai ida agora difísil atu implenta tanba iha buat balun iha lei ne’e mak halo konfusaun.
“Ita atu halo rekoñesimentu balun ba direitu iha uza kostumeiru, direitu tradisionál, direitu balun tanba dehan razaun barlakeadu, direitu kona-ba lisan balun rekoñese dehan katak mane mak iha direitu feto lae, hirak ne’e hotu,” nia esplika.
Jornalista : Natalino Costa
Editora : Julia Chatarina
