DILI, 02 Setembru 2025 (TATOLI)–Primeiru-Ministru (PM), Kay Rala Xanana Gusmão husu ba Prezidente Autoridade Munisípiu (PAM) sira iha kada munisípiu atu servisu hamutuk ho povu hodi dezenvolve nasaun ne’e hahú husi nunisípiu ida-idak.
Notísia Relevante: Polítika Governu implementa podér lokál importante ba dezenvolvimentu iha munisípiu
“PAM sira, hakarak saida ba munisípiu imi ida-idak nian, hakarak saida ba povu iha munisípiu, tenke sukat ha’u-nia kbiit to’o iha ne’ebé, maibé tenke konsulta ho povu. Tanba, povu nia presiza ita tenke halo tuir,” Xanana hateten bainhira sai oradór prinsipál iha semináriu nasionál ne’ebé realiza husi Prezidente Repúblika José Ramos-Horta ho tema “Papél jerasaun foun iha kontextu dezenvolvimentu nasionál hodi hatutan obra jerasaun tuan”, iha Palásiu Prezidensiál Nicolau Lobato, Bairru Pite, tersa ne’e.
Nia dehan, bainhira povu husu bee-moos, estrada tenke responde ho di’ak tanba dezenvolvimentu ne’ebé la’o halo ba povu atu goza ukun rasik-aan ne’e.
“Bainhira ita halo di’ak ba povu, povu sei sente, povu sei hatene, ida-ne’e mak buat hotu tenke la’o maibé tenke kompriende malu. Dezenvolvimentu halo uluk iha ne’ebá, halo uluk iha ne’e, tenke komprende malu, buat hotu sei halo iha fatin hotu,” nia hateten.
Xefe Governu hatutan, dezenvolvimentu iha Munisípiu tenke la’o ba oin no responsabilidade másimu PAM sira nian tenke halo koordenasaun di’ak ho povu, atu dezenvolvimentu la’o ba oin no labele falla.
Jornalista : Hortencio Sanchez
Editór : Cancio Ximenes
