BAUKAU, 03 Setembru 2025 (TATOLI)—Komisaun organizadora liuhosi Família Maksalak realiza semináriu ho tópiku “Povu mak funu, povu mak terus, povu mak manán funu no povu mak eroi boot ba ukun rasik-aan” hodi komemora loron-04 Setembru 1999 iha Postu Administrativu Baguia, Munisipiu Baukau.
Prezidente Komisaun Organizadora Família Maksalak, Domingos Alves esplika inisiativa realiza semináriu referidu ho objetivu atu hatutan istória ba juventude liuliu Baguia-oan hodi hatene loloos istória husi oradór sira kona-ba prosesu ukun-aan to’o anúnsia rezultadu konsulta populár iha loron 04 Setembru hafoin votasaun konsulta populár iha loron-30 Agustu 1999.
“Objetivu mak atu tranzmite istória luta libertasaun nasionál ba jerasaun foun ne’ebé sei iha faze aprendizajen iha ensinu eskolár,” Prezidente Komisaun Organizadora Família Maksalak informa ba TATOLI iha Postu Baguia, Kuarta ne’e.
Domingos Alves informa tópiku jerál semináriu ne’e tranzmitidu ba sub tópiku haat ho oradór ne’ebé diferente hanesan Luís Oliveira ‘Oan-fuik’ aprezenta sub tópiku “Signifikadu auto determinasaun ba Timor, akontesimentu hafoin anúnsia rezultadu konsulta populár”.
Oradór daruak Cornelio Gama ‘L7’ aprezenta sub tópiku “prinsípiu ho valór sira FALINTIL nian”, Lúcio Freitas Salvador ko’alia kona-ba “Papél polling staff nian iha loron konsulta populár no dezafiu ne’ebé enfrentadu” no oradór dahaat husi Komandante Polísia Nasionál Timor-Leste Munisípiu Baukau, Superintendente João Sancho Pires “Ko’alia kona-ba juventude no espíritu nasionalizmu hodi kontribui ba dezenvolvimentu nasionál”.
“Semináriu ne’e iha sub tema haat ne’ebé interligadu hahú husi inísiu funu to’o mai anúnsiu rezultadu no bá-oin partisipasaun juventude nian iha dezenvolvimentu nasionál,” Domingos subliña.
Komisaun Organizadora hato’o mensajen ba partisipante sira liuliu Baguia-oan atu aproveita matéria ne’ebé aprezenta husi oradór sira iha semináriu referidu nune’e bele aprende di’ak liután istória hotu para kontribui ba konstrusaun Estadu Timor-Leste.
Aleinde semináriu, Komisaun Organizadora realiza tan atividade seluk hanesan kompetisaun lee poezia no múzika rezisténsia, sunu lilin, misa agradesimentu, kari ai-funan no animasaun palku múzika ne’ebé hala’o durante loron-rua, 03-04 Setembru.
Entretantu, Komisaun Organizadora akumula iha mahon Família Maksalak kompostu husi juventude Postu Baguia no munisípiu balun, iha-ne’ebé hetan apoiu orsamentu husi Ministériu Solidariedade Sosiál, Autoridade Administrasaun Munisipál (AAM) Baukau no komunidade Baguia inklui Komandante Jerál PNTL, Komisáriu Jerál Henrique da Costa ho totál orsamentu hamutuk $1.500.
Jornalista: Natalino Belo
Editór: Xisto Freitas da Piedade
