DILI, 04 Setembru 2025 (TATOLI)—Ministériu Ensinu Superiór, Siénsia no Kultura (MESSK) no Institutu Katólika Formasaun Profesór (ICFP) Baukau, Kinta ne’e, realiza semináriu nasionál ho tema ‘Hametin kolaborasaun liuhusi fahe prátika di’ak sira iha formasaun inisiál profesór iha Timor-Leste.’Ministru Ensinu Superiór, Siénsia no Kultura, José Honório da Costa informa, Ministériu hamutuk parseiru internasionál kontinua promove dosente sira ho formasaun iha área edukasaun.
“Edukasaun baze ba ita-nia jerasaun foun sira ne’e importante. Nune’e, MESSK sempre fó apoiu ba Institutu Ensinu Superiór (IES) tanba papél importante Governu nian mak kontinua fasilita subvensaun hodi sira bele mellora liután sira-nia formasaun ba estudante hodi hasa’e kualidade edukasaun,” Governante ne’e hato’o iha ámbitu semináriu iha salaun City8, Manleuana, Kinta ne’e.
Notísia relevante : CNC no MESSK realiza formasaun ba dosente sira kona-ba matéria haat
Tuir Ministru, liuhusi formasaun kona-ba edukasaun mak bele eleva kualidade edukasaun iha Timor-Leste. Tanba ne’e, Governu liuhusi MESSK kada tinan sempre prevee subvensaun públika ba IES atu kapasita no hasa’e dosente sira-nia koñesimentu nune’e bele garante kualidade edukasaun.
Aleinde ne’e, Governu nota katak kestaun ne’e importante tanba bainhira Timor-Leste atu adere ba Asosiasaun Nasaun Sudeste Aziátiku (ASEAN, sigla inglés) tenke iha rekursu umanu ne’ebé kualidade edukasaun, entaun presiza oferese formasaun.
“Ministériu apoiu tebes ba ideia Ida-ne’e. Tanba iha futuru ami sei promove profesór iha Timor-Leste no formasaun ne’e mós hola parte ba prioridade Ministériu nian ne’ebé hodi atribui ba subvensaun públika ba Instututu Ensinu Superiór,” nia tenik.
Nune’e mós, Diretora Jerál MESSK, Maria Filomena Lay hatutan, formasaun ne’e importante atu oinsá fasilita, kapasita, promove no bele prátika ba estudante iha IES.
“Dadus ein jerál tuir formasaun liuhusi rejistu ne’e númeru boot mak 400 maibé ativu iha 250. Tanba dosente dalabarak la tuir hotu tanba hanorin no iha atividade barak,” Diretora Jerál katak.
Nia nota, dosente IES iha Dili laran de’it mak iha ona oportunidade atu tuir formasaun maibé ba sira iha munisípiu seidauk, hanesan Institutu Polítika Betanu (IPB), Institutu Universidade Naroman Esperansa (IUNE) no seluk tan.
Jornalista : Osória Marques
Editora : Julia Chatarina
