DILI, 05 Setembru 2025 (TATOLI)-Inspetór Jerál Jogu, Anibal Carvalho Martins, konsidera atividade jogu online ne’ebé hala’o iha Oekusi ne’e ilegál tanba empreza ne’e seidauk hetan lisensa ofisiál husi Inspesaun Jerál Jogu no Ministériu Turizmu no Ambiente (MTA).
Notísia Relevante: PSIK ho SNI buska apreensaun no desmantela jogu online ilegál iha Oekusi
“Ami halo ona reuniaun hamutuk ho Polisia Nasional Timor-Leste, Servisu Nasioná Intelijénsia, no Polísia Sientífika no Investigasaun Kriminál, hodi atualiza katak Inspesaun Jeral Jogu seidauk fó lisensa,” Inspetór Jerál ne’e informa ba Agência Tatoli liuhusi telefónika, ohin.
Inspetór Jerál hateten, empreza ida iha Oekusi ne’e hato’o duni proposta ba iha Vise Primeiru-Ministru Asuntu Ekonómia, ne’ebe hatun despaixu ba Inspesaun Jerál Jogu hodi orienta sira atu kumpre (kompleta) rekezitu balun, nune’e empreza refere tenke ba trata dokumentu ho kompletu no haruka fali ba IGJ.
“Bainhira ami haree dokumentu ne’e kompletu ona, entaun ita sei haruka karta pareser ba Ministru hodi hetan autorizasaun, maibé iha realidade buat sira-ne’e la akontese,” nia haktuir.
Empreza ne’e seidauk ba kompleta dokumentu no seidauk mós lori ba aprezenta iha Inspesaun Jerál Jogu, maibe sira ba loke uluk fali jogu ne’e iha Oekusi, nune’e agora iha hela prosesu investigasaun nia laran entaun empreza ne’e tenke kumpre lai prosesu investigasaun, tanba sira viola ona regra ne’ebé iha tuir lei haruka.
Tanba bazeia ba Dekretu-Lei nú. 6/2016 ne’e ko’alia kona-ba oinsá atu bele regula atividade jogu hotu-hotu la’ós online de’it.
Aleinde ne’e, IGJ mós iha ninia rekezitu ba prosesu lisensiamentu ne’e tenke submete proposta ba MKAE, hafoin despaixu ba IGJ halo verifikasaun, ba trata sertidaun lisensa komersiál iha SERVE, I.P, tuir mai ba depozitu osan iha banku no tenke submete mós sertidaun kriminál husi sira-nia nasaun, presiza aprezenta modelu ba jogu mak oinsá.
“Nune’e, ami-nia ekipa inspesaun sei halo inspesaun ba sira-nia fatin, haree fasilidades, hafoin halo relatóriu pareser jurídiku ida ba Ministru hafoin halo kontratu hodi kontinua implementa atividade”, nia relata.
Tenik nian, bainhira ekipa Inspesaun mak identifika irregularidade ruma, normalmente parte PNTL, PSIK iha kompeténsia hodi halo atuasaun.
Tamba ne’e husu ba emprezáriu sira-ne’ebé hala’o atividade jogu tenke bazeia ba lei ne’ebé legál, tanba bainhira kontra regras IGJ hamutuk ho parte kompeténsia sira sei halo atuasaun.
Aleinde ne’e Diretor Ezekutivu SERVE, I.P, Fausto Soares Dias, hateten kona-ba atividade jogu online ne’e SERVE, I.P halo de’it rejistu ba sertidaun tipu komersiál, ne’e signifika prosesu ne’e remata ona ne’e la’e, tamba empreza ne’e sei kontinua ba halo tratamentu iha Ministériu Koordenador Asuntu Ekonómia hodi kontinua verifika hafoin despaixu ba sektoriál Inspesaun Jerál Jogu hodi fó lisensiamentu.
“Maibe empreza ne’e hatudu de’it dokumentu legál ida sertidaun tipu komersiál ba ekipa investigasaun sira, ne’e la vale ida tanba nia tenke hetan lai lisensa husi IGJ foin bele realiza atividade,” Diretór ne’e hateten.
Nune’e, bainhira empreza ne’e kontra lei tanba lahetan lisensiamnetu ne’ebé legál, tanba sertidaun tipu komersiál ne’e ajuda atu empreza hetan tipu komersiál hodi hala’o atividade iha Timor.
Notísia Relevante: SERVE rejista empreza 69,926 trata sertidaun lisensa ba tipu komersiál
Jornalista : Alexandra da Costa
Editór : Cancio Ximenes
