VIKEKE, 05 Setembru 2025 (TATOLI)—Progresu kontrusaun kapela Uabubu, Postu Administrativu Ossú, Munisípiu Vikeke liuhusi orsamentu Programa Nasionál Dezenvolvimentu Suku (PNDS) iha faze konkluida.
“Progresu konstrusaun kapela iha ami-nia suku, daudaun ne’e besik atu ramata ona, atinje ona 98%, reboka ona, keramik (azuleju) iha kapela laran mós hotu ona. Ne’ebé, agora badaen ne’ebé apoia husi komunidade mak oras ne’e pinta hela. Odamatan mak seidauk taka tanba agora sei pinta. Bainhira pinta hotu taka ona odamata ne’e hotu ona,” Xefe Suku Uabubu, Jacinto M. A. da Cruz dehan ba TATOLI, iha Suku Uabubu, Sesta ne’e.
Nia dehan, preparasaun ba inaugurasaun, autoridade no sarani sira hosi suku Uabubu forma ona komisaun ne’ebé hein finaliza, marka ona loron hodi halo inaugurasaun.
“Ami haree prosesu konstrusaun kapela atu ramata ona ne’ebé komisaun ba inaugurasaun ami forma ona, hodi hein prosesu pinta ne’e hotu ita halo inaugurasaun,” nia informa.
Notísia relevante: https://tatoli.tl/2025/04/15/progresu-konstrusaun-kapela-uabubu-ossu-atinje-ona-50/
Xefe Suku Uabubu tenik prosesu konstrusaun kapela ne’e kle’ur tanba klima (udan), hodi difikulta transporta materiál lokál no fabrikadu ba fatin konstrusaun labele asesu. Tan ne’e mak prosesu konstrusaunn ne’e lori tinan mak foin konkluidu.
“Projetu ne’e kle’ur tanba kondisaun udan halo estrada sira mós sai aat hotu, difikulta ami fornese materiál ba fatin konstrusaun mós ladi’ak. Depoiz udan ne’e para mak foin ami aselera serbisu obra ne’e,” nia haktuir.
Kona-ba projetu konstrusaun ba kepela Uabubu ne’e hahú implementa iha tinan 2024, liuhusi orsamentu adisionál PNDS nian ne’ebé aloka ba obra referida ho montante hamutuk $62.306.
Kapela ne’e sei benifísia ba sarani katóliku sira husi Suku Uabubu hamutuk 2.717, ho totál uma-kain 578, kompostu husi Aldeia Buanurak, Osogori, Lekibuti, Uailia no Letame.
Jornalista: Vitorino Lopez da Costa
Editór: Xisto Freitas da Piedade
