DILI, 08 Setembru 2025 (TATOLI)—Ministériu Justisa (MJ) daudaun ne’e seiduak konklui estatutu Guarda Prizionál tanba presiza halo diskusaun kle’an molok lori bá Konsellu Ministru hodi halo aprovasaun.
Ministru Justisa, Sergio Hornai esplika, maioria husi estatatu ne’e ninia konteúdu loos ona, maibé presiza haree fali iha parte balun.
“Estatutu ba Guada Prizionál ne’e tama ba rejime jurídiku espesiál ne’ebé regula iha Lei Komisaun Funsaun Públika. Tanba ne’e, presiza haree didi’ak molok halo aprovasaun iha Ministériu Justisa hodi lori mai Konsellu Ministru hodi diskute. Hein de’it ona apresiasaun finál ba tabela fiksasaun kona-ba sira-nia remuneratóriu balun, ein termu konteúdu laiha problema,” Ministru hato’o ba Jornalista sira hafoin partisipa iha reuniaun estraordinária Konsellu Ministru, iha Palásiu Governu, Segunda ne’e.
Notísia relevante : MJ sei submete hikas Estatutu Guarda Prizionál ba KM
Nia dehan, prizaun tama iha kategoria rejime espesiál, tanba ne’e mak estatutu ba Guarda Prizionál ne’e presiza haree didi’ak.
“Sira ne’e serbisu hotu funsionáriu, maibé sira goza sira-nia rejime espesiál hanesan konforme define tina ona iha lei Komisaun Funsaun Públiku. Ita iha rejime jerál no rejime espesiál, entaun rejime espesiál ne’e ema sira ne’ebé mai ho serbisu ida-ne’ebé ho karakterístika espesífiku oituan, liliu sira-nia serbisu labele hanesan, ninian definisaun hanesan rejime jerál,” Ministru esplika.
Governante ne’e garante katak iha tempu badak nia laran sei aprezenta hikas estatutu Guarda prizionál ba Konsellu Ministru.
“Ita agora iha Setembru, ita hein katak ida-ne’e hotu, ita hakat fali ba estatutu ne’e para hotu-hotu fó nian pareser. Ha’u rasik mós tenke prepara atu mai defende motivasaun sira ne’e iha Konsellu Ministru,” nia katak.
Jornalista : Natalino Costa
Editora : Julia Chatarina
