OEKUSI, 10 Setembru 2025 (TATOLI) – Prezidente Komisaun Organizadora ba Masakre Bobo-Ufe Tumin, Agostu Poto Obe, rekomenda ba Autoridade Rejiaun Administrativa Espesiál Oekusi Ambeno (RAEOA) atu kria deliberasaun ida ba loron akontesimentu 09 Setembru nu’udar loron feriadu rejionál atu fó onra ba martir no éroi sira iha Oekusi.
Notísia relevante:Hanoin hikas Masakre Tumin: “Goza ukun rasik aan ne’e, keta haluha sira”
Tuir nia, tanba durante tinan barak, Autoridade RAEOA ladun fó importánsia ba loron Masakre sira iha Oekusi, hanesan masakre Sikone, Masakre Maquelab, masakre Oésono no Masakre seluktan, ne’ebé akontese iha tinan-1999.
“Bele ka la’e, Sua eselénsia Prezidente Autoridade RAEOA, kria netik deliberasaun ida, ba loron 09 Setembru, sai loron feriadu rejionál ida, hodi kobre hela masakre sira hotu iha Oekusi tomak, tau hanesan ohin, atu ema hotu relembra no fó omenajen minutu ida ba ita-nia martir no éroi sira hotu,” nia dehan iha ámbitu selebrasaun loron masakre Tumin, 09 Setembru iha Oekusi.
Entretantu, Masakre Bobo-Ufe Tumin, akontese dahuluk iha loron 08 Setembru 1999, mílisia konsege halakon ema na’in-14 nia vida, no kontinua ba loron 09 Setembru 1999, milísia kontinua hamate tan ema na’in-72 iha fatin Teonlasi sub-rejiaun Pássabe.
Notísia relevante:Masakre Tumin: Milísia oho ema na’in-14 iha 08 setembru 1999 (I)
Hatan ba rekomendasaun ne’e, Prezidente Autoridade Rejiaun Administrativa Espesiál Oekusi Ambeno (RAEOA), Régio Servantes Romeia da Cruz Salu, rekoñese, tan ne’e nia promete sei dekreta liuhusi deliberasaun bazea kompeténsia lei númeru 3/2014 ba kriasaun RAEOA.
“Loron 09 Setembru ne’e, sai sentru ba loron reflesaun. Entaun loron ida festivál tomak, ita-bele halo festivál ne’e semana ida, no loron ida tenke deskansa atu mai loron ne’e, atu hetan bee-matan malirin ba reflesaun foun, sai loron espesiál ba Oekusi nian. Ita sei dekreta nu’udar deliberasaun ida, bainhira ami-nia mandatu loron ida ka minutu ida, ita tenke aproveita, tanba lei númeru 3/2014 fó nafatin kompeténsia atu ita uza, nune’e fundamenta prinsipíu povu nia dignidade iha prátika asaun administrative governativa,” nia hateten.
Notísia relevante:Masakre Tumin: “Lori katana, taa kotu tan ninia liman sira-ne’e” (Parte-II)
Jornalista: Abílio Elo Nini
Editór: Rafael Ximenes de A. Belo
