VIKEKE, 12 Setembru 2025 (TATOLI)—Xefe Suku Luka, Postu Vikeke Vila, Munisípiu Vikeke, Manuel Gomes informa progresu reabilitasaun postu saúde no morru hale’u postu saúde husi Programa Nasionál Dezenvolvimentu Suku (PNDS) tinan 2025 iha Suku Luka daudaun ne’e besik konkluidu.
“Kona-ba programa PNDS ba tinan 2025, ami fó prioridade área saúde nune’e ami halo reabilitasaun ba postu saúde, estensaun sala ida no morru haleu postu saúde hodi asegura fasilidade sira iha postu saúde laran,” Manuel Gomes ba TATOLI iha Suku Luka, Sesta ne’e.
Autoridade Suku Luka ne’e hatutan progresu fíziku ba reabilitasaun postu saúde no estensaun sala no morru protesaun agora atinje ona 90%.
“Husi atinjimentu ne’e parte konstrusaun morru nian ramata ona. Agora daudaun badaen sira kontinua konstrui estensaun sala ida besik taka kalén ona. Ha’u fiar katak tempu badak ami sei finaliza obra PNDS iha ami-nia suku,” nia hato’o.
Notísia relevante: PNDS Vikeke sei implementa projetu 40 iha suku 36
Nia haktuir obra PNDS ne’ebé implementa iha Suku Luka bainhira finaliza sei asegura postu saúde tanba morru proteje ona balada sira la tama ona iha postu saúde laran.
Manuel informa konstrusaun morru protesaun no estensaun sala ida badaen hamutuk na’in-haat no badaen sira-ne’e husi Suku Luka rasik.
Enkuantu, reabilitasaun postu saúde no morru hale’u postu saúde gasta orsamentu PNDS totál hamutuk $29.092,55.
Tuir dadus, populasaun Suku Luka hamutuk 2.395 kompostu husi aldeia haat mak hanesan Canlor, Iramer, Uma-Boot no Uma Lor.
Jornalista: Vitorino Lopez da Costa
Editór: Xisto Freitas da Piedade
