PNDS apoia osan rihun $50-resin ba Suku Dilór hodi haki’ak fahi
DILI, 16 Setembru 2025 (TATOLI) – Xefe suku Dilór, Postu Administrativu Lakluta, Munisípiu Vikeke, Jacinto Ximenes, informa, Programa Nasionál Dezenvolvimentu Suku (PNDS) apoia verba ho montante rihun $50-resin ba prepara haki’ak fahi.
“Iha tinan ida-ne’e (2025) Prezidente Autoridade Munisípiu Vikeke uza nia kompeténsia hodi apoiu orsamentu adisionál husi Programa Nasionál Dezenvolvimentu Suku ba ami-nia Suku Dilór hodi implementa programa haki’ak fahi iha ami-nia suku,” Jacinto Ximenes, hateten ba TATOLI, iha suku Dilór, Tersa ne’e.
Nia dehan sira hahú halo preparasaun ba sosa fini fahi hamutuk 20.
“Iha faze implementasaun ne’e, ba programa fahi ne’e, ami sei sosa uluk fini fahi ne’e hamutuk 20, depoiz la’o mak aumenta. Ha’u sente programa ida-ne’e de’it tanba ba futuru mak progresu di’ak sei benifísia ba ami-nia povu Dilór. Tan ne’e, programa ne’e ami sei tau matan ho di’ak, atubele hetan rezultadu,” nia akresenta.
Autoridade Suku Dilór ne’e hatutan, programa haki’ak fahi hahú 2025 to’o 2030. Programa haki’ak fahi ne’e sei tau matan husi Grupu Agrikultór Suku Dilór, ne’ebé sei okupa rai hamutuk ektare tolu.
“Programa ne’e, ha’u (Xefe Suku Dilór) mak hanesan koordenadór no membru hamutuk na’in-15, nune’e mós sei tau matan husi PAM no akompaña tékniku husi PNDS Munisípiu Vikeke,” nia dehan.
Iha semana ida-ne’e téknika sira husi Xina sei mai haree direta fatin haki’ak fahi ne’ebé lokaliza iha Suku Dilór.
“Depoiz téknika sira mai vizita tiha fatin hotu. Membru grupu na’in tolu mak sei ba hala’o estudu komparativu iha Xina hodi bá haree prosesu haki’ak fahi iha ema-nia rain. Tuir planu programa haki’ak fahi ne’e ami sei implementa iha fulan-Setembru ne’e to’o tinan 2030,” nia konklui.
Notísia relevante:Grupu Lekimalik inisiativa tau osan hamutuk haki’ak animál
Jornalista :Vitorino Lopes da Costa
Editór: Rafael Ximenes de A. Belo
