PR entrega prémiu ba manán-na’in kompetisaun filme dokumentáriu Papa Francisco vizita TL
DILI, 16 Setembru 2025 (TATOLI)—Prezidente Repúblika, José Ramos-Horta, tersa (16 Setembru 2025) ne’e, entrega prémiu ba manán-na’in kompetisaun falo filme dokumentariu badak kona-ba Papa Francisco vizita Timor-Leste, iha 09-11 Setembru 2024.
Notísia Relevante: Papa Francisco: Timor-Leste nia furak mak povu, haree no hadomi imi-nia povu ba!
“Kompetisaun ne’e ha’u mak inisia, kona-ba sira na’in-lima (5) ne’ebé manán premiu ne’e ha’u nein tama iha juri, sira ekipa juri mak hili, sira mak deside, ida-ne’e atu fó insentivu ba ita-nia videografer kriativu sira,” Xefe Estadu ne’e hateten ba jornalista sira iha Palásiu Prezidénsiál Nicolau Lobato, Bairru Pite, tersa (16 Setembru 2025) ne’e.
Nia dehan, objetivu husi halibur video furak hirak ne’e atu sai hanesan dokumentu hodi tau iha Palásiu Prezidensiál husi vizita Papa Francisco nian mai Timor-Leste.
“Ida ne’e atu halo hanesan dokmentariu husi vizita Amu Papa Francisco nian mai Timor-Leste, ida-ne’e sai ona hanesan propriedade Prezidente nian, maibé sé de’it mak hakarak uza bele uza de’it, hanesan Telivizaun sira, Online sira, ita bele lori mós ba foho hodi loke ba ita-nia komunidade atu haree,” Ramos-Horta dehan.
Antes ne’e Prezidente Repúblika mós rekolla ona fotografia lubuk ida husi vizita Papa Francisco mai Timor-Leste iha fulan-setembru tinan kotuk no fotografia hirak ne’e sei haruka balun ba vatikanu hodi tau hanesan memória.
Iha fatin hanesan manán-na’in, Virgínia dos Santos Silva, hato’o agradesementu ba Prezidente Repúblika ne’ebé loke ona kompetisaun ba filme dokumentáriu badak ba Papa Francisco vizita Timor-Leste no orgullu sai hanesan manán-na’in.
“Agradese ba Prezidente Repúblika bele loke ona kompetisaun ida ne’e, hanesan videografer ida ha’u sente kontente loos tanba bele sai manán-na’in. Maibé ida-ne’e la’ós importante ba ha’u kona-ba manán, maibé importante mak oinsá ita bele kaptura video ne’ebé di’ak husi Amu Papa nia vizita mai ita-nia nasaun, ida-ne’e atu rai hela ba jerasaun ba jerasaun tuir mai bele haree,” Virgínia hateten.
Durante kompetisaun, juri sira haree no ánaliza entre vido hamutuk 20 liu, maibé so video lima (5) de’it mak tama iha kriteria nune’e, ikus video lima (5) ne’ebé prodús husi ema na’in-lima (5) ne’e mak sai hanesan manán-na’in.
Dokumentáriu badak sira-ne’ebé manán hili husi submisaun barak lubuk ida kona-ba sira-nia kriatividade, abilidade téknika no reprezentasaun auténtiku husi tema “Que a Vossa Fé, Seja a Vossa Cultura”, ne’ebé destaka mensajen sira pás nian, kompaixaun no unidade husi Amu-Papa Francisco.
Manán-nain sira ba kompetisaun filme dokumentáriu badak kona-ba Papa Francisco nia vizita iha Timor-Leste ne’e mak hanesan;
Primeiru lugar, Zyno Pinto, simu prémiu osan ho montante $1,700 husi ninia rezultadu prodús filme dokumentáriu badak ho titulu “Amo Papa Francisco”.
Segundu lugar, Virgínia dos Santos Silva, simu osan montante $1.600 husi ninia rezultadu prodús filme dokumentáriu badal ho titulu “Furak Ne’ebé Timor iha mak Nia Povu Sira”.
Terseiru Lugar, Frederick Lopes, manán osan $1.500 husi ninia rezultadu prodús filme dokumentáriu badak ho titulu “Que a Vossa Fé Seja a Vossa Cultura”.
Kuartu lugar, Justino Maria, manán osan $1.400 husi ninia rezultadu prodús filme dokumentáriu badak ho titulu Papa Francisco.
Kintu lugar, Novai Magno, manán osan ho montante $1.300 husi rezultadu prodús filme ho titulu “Papa nia vizita sai hanesan esperansa bo’ot ba sarani Timor”
Notísia Relevante: Kaleidoskópiu 2024: Papa Francicsco; “Ha’u-nia laran monu loos ba Timor-Leste!”
Jornalista : Hortencio Sanchez
Editór : Cancio Ximenes
