DILI, 17 Setembru 2025 (TATOLI)—Diretór Servisu Apoiu Diagnóstiku no Terapeutiku Óspitál Nasionál Guidu Valadares (HNGV), Vidal de Jesus Lopes, hateten durante manifestasaun loron tolu (3) iha resintu Parlamentu Nasionál nia oin, vítima na’in-neen (6) mak evakua ba HNGV tanba hetan kanek.
Notísia Relevante: Loron daruak: Membru PNTL ida no estudante na’in-tolu hetan kanek
“Ha’u atu relata de’it, Hospitál Nasionál Guido Valadares iha loron primeiru manifestasaun, manifestante na’in-haat (4) mak kanek, na’in-tolu (3) kanek kmaan sira mai kurativu fila kedan no na’in ida-ida (1) mak sei baixa no halo observasaun hela. Agora, iha loron horisehik iha na’in-rua (2) mak hetan kanek, ida kanek kmaan hetan tratamentu fila uma ona no ida fali mak katuas ho idade 62 mak gás lakrimozeniu kona nia matan, depois monu nune’e sei baixa hela,” Vidal hateten ba jornalista sira iha HNGV, Bidau, kuarta ne’e.
Nia dehan, daudaun ne’e pasiente nia kondisaun jerál di’ak ona maibé pasiente katuas ida mak antes ne’e sofre moras fuan.
“Ita-nia ema ida (1) sei baixa ne’e mós antes ne’e moras ho problema fuan, ho nune’e insidensia gás lakrimozeniu kona entaun nia monu, depois kanek uitoan iha nia ulun no suku pontu ida (1) ho insidensia no situasaun ne’e nia mós stroke skandric foun. Antes ne’e, pasiente ho hipertensaun no problema fuan ho situasaun sira-ne’e mak halo nia monu,” nia dehan.
Nia esplika, kona-ba pasiente referidu kondisaun hahú di’ak ona, maibé nia isin sorin mak labele book-aan, no dadaun ne’e sei baixa hela iha sala medisina homen ho kondisaun jerál bazeia ba relatóriu husi médiku sira.
“Bainhira mak pasiente ne’e alta, depende ba nia kanek. Laiha problema maibé nia rekuperasun problema mak neorolojia ne’e, ho insidensia nia hetan kedas stroke skandric iha ne’ebá. Depois ami leno iha parte ulun hetan duni scand’s stroke, tanba konsidensia ho insidensia ne’e rasik,” nia informa.
Iha fatin hanesan, família husi Pasiente Januario da Silva, Marcia Silva hateten, vítima ne’ebé agora daudaun baixa hela la’ós envolve iha manifestasaun maibé hamriik iha uma-oin no Polísia Nasionál Timor-Leste (PNTL) tiru gas lakrimozeniu hodi kona- kedan vítima ne’e.
“Ha’u-nia Pai la’ós ba tuir manifestasaun, ha’u-nia Pai sai mai iha uma-oin ho di’ak no ami la sai hotu. Alin estudante sira-ne’ebé mak halo manifestasaun labele liu ba fatin demostrasaun tenke liu husi ami-nia uma-oin, no balu halai tama ami-nia uma no viziñu sira-nia uma. Polísia tiru gas lakrimozeniu tuir kona kedan ha’u nia Pai to’o monu raan sai, ami família evakua kedan ba sentru saúde Vera Cruz. Depois iha ne’ebá halo transferénsia mai fali HNGV no daudaun ne’e kondisaun di’ak uitoan ona,” Marcia Silva dehan.
Manifestasaun ne’ebé estudante Universidade sira halo hodi ezije ba Parlamentu Nasionál (PN) atu kansela alokasaun montante millaun $4,2 iha Orsamentu Jerál Estadu (OJE) 2025 atu sosa viatura foun unidade 65, hodi fasilita mobilidade no serbisu deputadu sira iha lejislatura daneen.
Aleinde ne’e, sira husu mós ba PN atu halakon totál lei pensaun vitalisia ne’ebé daudaun ne’e eziste hela hodi fó previleiju de’it ba grupu balun.
Maibé ho ejijensia estudante nian, iha demostrasaun loron datoluk konsege iha duni solusaun, tanba PN liuhusi deputadu bankada CNRT, FRTILIN, PD, PLP no KHUNTO aseita atu hapara lei pensaun vitalisa no kansela sosa kareta Prado ba deputadu sira.
Jornalista : Felicidade Ximenes
Editór : Cancio Ximenes
