Asaun manifestante sunu viatura Estadu ne’e perturba orden públiku
DILI, 18 Setembru 2025 (TATOLI)—Governu liuhusi Vise-Ministru Asuntu Parlamentár (V-MAP), Aderito Hugo da Costa, hateten direitu ba manifestasaun ne’e tenke garantidu mós tuir regulamentu konstituisaun, karik manifestante balun mak sunu ona viatura Estadu nian signifika asaun ne’e konsidera hanesan mós perturba orden públiku.
Notísia Relevante: PNTL identifika ona ema na’in-12 ne’ebé tama manifestasaun inklui sunu karreta
“Tanba asaun ne’e maneira estraga karreta Estadu ne’e iha hela ministériu kompetente sira-ne’ebé responsável hodi halo investigasaun,” Vise-Ministru ne’e hateten ba jornalista sira hafoin ramata reuniaun Konsellu Ministru, iha Palásiu Governu, Dili, ohin.
Vise-Ministru dehan, klaru katak manifestante iha direitu ba manifestasaun maibé tenke garantidu tuir konstituisaun ne’ebé regula tuir lei. Konstituisaun fó ona direitu ba manifestante sira hodi goja liberdade espresaun maibé tenke tuir dalan loos.
“Liberdade espresaun iha manifestasaun ne’e iha ninia regra rasik, no asuntu ida ko’alia kona-ba nesesidade atu halo alterasaun ba lei manifestasaun,” nia dehan.
Nia dehan, ida-ne’e kompeténsia husi Parlamentu Nasionál nian no desizaun tomak iha sira, Governu halo akompaña de’it tanba ne’e orgaun soberanu ketak ida. Hanesan mós bainhira Governu halo nia servisu Parlamentu akompaña liuhusi halo fiskalizasaun.
Notísia Relevante: PR Ramos-Horta lamenta manifestante sunu karreta Estadu
Jornalista : Alexandra da Costa
Editór : Cancio Ximenes
