DILI, 18 Setembru 2025 (TATOLI)—Governu liuhusi Ministériu Obra Públika halo ona pagamentu ba komunidade afetadu alargamentu estrada ne’ebé akontese iha Dili laran hanesan Fomentu I, Fomentu II, Kuluhun, Bidau Pasar Sengol, Bebonuk, Komoro Moris Foun, Aitarak-Laran, Ai-mutin no Fatuhada hamutuk na’in-702.
Notísia Relevante: MOP selu ona millaun $4,3 ba vítima despeju administrativu no alargamentu estrada
“Afetadu ba indemnizasaun sira-ne’e balun, ita halo ona pagamentu hamutuk na’in-702,” Diretór Departamentu Planeamentu Peskiza no Dezenvolvimentu Ministériu Obra Públika, Santino Barreto, informa ba Agência Tatoli iha nia kna’ar fatin, Palapasu, ohin.
Komunidade afetadu iha parte Fomentu I nian antes ne’e halo ona pagamentu ba uma kain 10 iha faze dahuluk ho montante $74,646.12, iha faze daruak totál uma kain 15 ho montante $148,095.58, faze datolu totál afetadu na’in 10 ho montante $74,646.12 no iha faze dahaat uma kain hamutuk 15 ho montante $148,095.58.
Enkuantu, iha parte Fomentu II nian, Governu halo pagamentu iha faze dahuluk ba afetadu hamutuk na’in-45 ho montante $528,005.02 no iha faze daruak nian afetadu na’in-218 ho osan indemnizasaun hamutuk $2,274,265.66.
Iha fali área Kuluhun nian, Governu selu ona faze dahuluk hotu ona no iha faze daruak totál afetadu na’in-19 ho osan hamutuk $94,944,17, iha Bidau Pasar Sengol iha faze dahuluk totál afetadu na’in-55 ho montante $317,298,54 no iha faze daruak nian totál uma kain hamutuk 26 ho montante $148,488.72.
Aleinde ne’e, Governu halo ona pagamentu ba área Bebonuk aldeia Meti I no II iha faze daruak ho totál afetadu na’in-15 no montante $87,490.87, Bebonuk aldeia 20 Setembru ho totál afetadu na’in-52 ho montante $224,395.22.
Ih Komoro Moris Foun, iha faze dahuluk, Governu halo ona pagamentu ho montante $707,305.80 ba afetadu na’in-114, iha faze daruak halo ona pagamentu ba afetadu na’in-24 ho montante $150,851.26, iha faze datolu afetadu na’in-neen (6) ho osan $45,896.80 no iha Aitarak-Laran totál afetadu 57 ho montante $479,053.03.
Iha área Ai-mutin ne’e, rai privadu nian no Governu rejista afetadu hamutuk 12 ne’ebé Governu halo ona pagamentu ba sira ho montante $34,088.89, Ai-mutin iha road section nian totál afetadu na’in-rua (2) ho osan pagamentu hamutuk $18,612,38, iha Fatuhada ne’e afetadu hamutuk na’in-lima (5) ho montante pagamentu faze dahuluk $25, 585.58, iha pagamentu faze daruak afetadu na’in-rua (2) ne’ebé governu selu oha ho osan $9,237.94.
Nia hatutan, Governu mós haruka tan lista afetadu balun iha segunda ne’e ba parte Finansa iha Ministériu Obra Públika nian, ne’ebé tempu badak sei prosesa ba pagamentu ho totál afetadu iha lista ne’e hamutuk na’in-39.
“Afetadus sira ne’e kompostu husi Ai-mutin road section na’in-ida (1) ho montante $1,159.62, Bebonuk aldeia Meti I, II hakat ba faze pagamentu datoluk nian ho totál afetadu na’in-neen (6) ho orsamentu $13,291.56, Fomentu I kontinua hakat ba pagamentu dalima ona no afetadu na’in-tolu (3) ho montante $16,031.59, Bairu Pite Unpaz nian ho totál afetadu na’in-15 ho osan hamutuk $32,340.82 no Komoro RMS afetadu hamutuk na’in-11 ne’ebé Governu sei selu ho montante $31,589.08,” nia dehan.
Enkuantu afetadus iha parte Bekora nian foin husu aprovasaun husi Ministru Obra Públika hodi halo asina ba afetadu na’in-70-resin.
Notísia Relevante: MOP sei publika lista naran afetadu ba alargamentu estrada Kuluhun-Bekora
Jornalista : Alexandra da Costa
Editór : Cancio Ximenes
