DILI, 21 Setembru 2025 (TATOLI) – Deputadu António Verdial Ferreira husi partidu Klibur Haburas Unidade Nasionál (KHUNTO) hakotu iis iha sábadu (20/9) kalan pur volta tuku 23h30.
Matebian nia kaben, Sofia do Rosário Caldas, hateten iha segunda (15/9) matebian sei bá tuir plenária iha Parlamentu Nasionál, nune’e iha tersa (16/9) kalan sente nehan moras loos.
Nune’e, iha loron kuarta (17/9) familia lori matebian bá halo tratamentu hodi hasai raan iha Dili Medical Centre (DMC) no doutór sira halo atendimentu.
“Ami hasai tiha raan no husi rezultadu doutór haree no rekomenda katak matebian tenke halo tratamentu kontínua bá Ospitál Nasionál Guido Valadares, tanba moras nehan ne’e grave ona”, Sofia haktuir ba Tatoli iha Manleuna, ohin.
Nia relata katak matebian sofre moras kle’ur ona, maibé durante halo tratamentu di’ak no foin daudaun, iha tersa-feira liubá ne’e mak matebian sente moras nehan fali, nune’e ba halo tratamentu to’o hakotu iis.
“Nia moras la’ós grave, ne’ebé nia mate mós la’ós moras todan, maibé buat ida dehan nehan ne’e nia abut mak tun tiha ba kakorok ne’e mak halo nia ko’alia ladi’ak, tafui kaben, dada iis mós ladi’ak, ne’e mak nia iis kotu ne’e. Matebian durante ne’e sofre mak moras nehan no foin daudaun moras filafali ne’e mak rezulta nia hakotu iis. Matebian laiha moras seluk”, nia relata.
Tuir ajenda ne’ebé iha, aban sei lori matebian bá Parlamentu Nasionál hodi presta omenajen ikus, hafoin lori bá kedas nia moris fatin iha Ainaru no iha tersa (23/9) halo serimónia fúnebre.
Iha fatin hanesan, Konselleiru másimu Partidu KHUNTO, José dos Santos Naimori Bucar, triste tanba lakon deputadu António Verdial.
“Husi partidu lakon figura di’ak ida, tanba ema ne’e pasiénsia, laiha problema, buat sala nia dehan laloos no loos nia dehan loos. Ida-ne’e mak durante ne’e iha nia vida tomak nia halo”, nia konta.
Nia dehan, matebian hanesan konselleiru nasionál no durante ne’e nia hamutuk ho estrutura partidu perkorre munisípiu hothotu ne’ebé lori mós partidu bele hetan asentu parlamentár.
“Nune’e matebian mós eleitu hanesan deputadu ida ne’ebé iha lejislatura daneen ida-ne’e”, Naimori haktuir.
Kona-ba substituisaun deputadu António Verdial, Naimori hateten kestaun subtituisaun ne’e hein haloot tiha matebian depois mak partidu haree sé mak atu substitui.
Jornalista: Natalino Costa
Editora: Maria Auxiliadora
