OEKUSI, 23 Setembru 2025 (TATOLI) – Dezde 2013 to’o trimestre daruak 2025 ne’e, Serbisu Saúde, Rejiaun Administrativa Espesiál Oekusi Ambeno (RAEOA), rejista kazu ona ema na’in-96 ho pusentu 3,6% mak infetadu ho virus HIV-SIDA.
Adjuntu Diretór Serbisu Saúde RAEOA, Tomas Vasco, fó-sai estatístika rejionál ne’e, perante divulgasaun transmisaun virus HIV-SIDA iha suku Naimeko, sub-rejiaun Pante Makasar, segunda ne’e.
“Hahú 2013 to’o 2025 trimestre daruak, ita rejista kazu infetadu ho virus HIV-SIDA hamutuk 96, husi númeru ne’e, rejista maka’as iha área Pante Makasar,” Tomas Vasco informa iha ámbitu divulgasaun transmisaun virus HIV-SIDA iha suku Naimeko.
Tanba ne’e, nia dehan, oportunidade ohin, liuhusi divulgasaun ba kazu HIV-SIDA, ne’ebé organiza husi INCSIDA, importante, nune’e joven inan-aman bele rona direita, oinsá deteta, oinsá halo prevensaun to’o faze tratamentu.
Notísia relevante:Inklui ‘zona mean’, INCSIDA divulga informasaun kona-ba transmisaun HIV-SIDA iha RAEOA
Ezekutivu ne’e informa, kazu 96 ne’e rekolla liuhusi ezaminasaun bainhira profisionál saúde sira halo screening masal liuhusi hasai raan iha fasilidade saúde hanesan iha postu saúde, sentru saúde no Ospitál Referál Oekusi.
“Meiu deteta kazu sira-ne’e, bainhira pasiente mai iha fasilidade saúde, pasiente hasai raan, hafoin ba teste iha laboratoriu mak foin hatene nia rezultadu,” nia dehan.
Tanba ne’e, atu solusiona kazu sira-ne’e, polítika serbisu saúde Oekusi, sei kontinua implementa programa promosaun saúde iha nivél suku no aldeia sira, atu konsiénsializa sidadaun hotu hodi kuidadu aan liuhusi hasai raan no labele halo relasaun seksuál livre.
Notísia relevante:Timor-Leste iha tinan 2013-2025 rejista ema hamutuk 2.400 pozitivu HIV-SIDA
Rekorde katak, antes ne’e, Autoridade RAEOA realiza enkontru koordenasaun ho servisu saúde provinsia Nusa Tenggara Timur (NTT) liuliu distritu Timur Tengah Utara (TTU) no distritu Kupang atu sebvisu hamutuk foku liu ba moras hada’et sira.
Dadus rejistadu iha serbisu saúde Oekusi, dezde 2013 to’o Dezembru 2022, rejista ona ema na’in 10-resin mak hakotu ona vida ho vírus HIV-SIDA.
Entretantu, tuir dadus kumulativu ne’ebé rejista kazu HIV-SIDA husi 2003 to’o Juñu 2025 hamutuk 2.400 mai husi munisípiu 13 mak hanesan, iha munisipíu Aileu rejista kazu 16 (0,7%), Ainaru rejista 40 (2%), Atauro rejista 1 (0,04%), Baukau rejista 76 (3%), Bobonaru rejista 126 (5%), Kovalima 97 (4%) no munisipíu Dili ma kaas liu tanba rejista 1.767 (75%).
Nune’e mós, Ermera rejista 48 (1,7%), Likisá rejista 32 (1%), Lautein rejista 22 (0,9%), Manatutu rejista 24 (0,9%), Manufahi rejista 32 (0,9%), Oekusi rejista 96 (3,6%) no Vikeke rejista 23 (0,7%).
Jornalista: Abílio Elo Nini
Editór: Rafael Ximenes de A. Belo
