DILI, 21 Agostu 2025 (TATOLI)—Timor-Leste iha tinan 2013 to’o Jullu 2025 rejista ema hamutuk 2.400 pozitivu ba Human Immunodeficiency Virus- Acquired Immunodeficiency Syndrome (HIV-SIDA).
“Iha data ne’ebé mak Ministeriu Saúde rejista data komulativu husi 2013 to’o 2025 Jullu, ema afetadu iha 2.400. husi númeru ne’e mate kuaze 400 resin, restu halo hela tratamentu, maibé ida ita la hatene no seidauk rejista ne’e barak liu ona,” Prezidente Institutu Nasionál Kombate HIV-SIDA (INCSIDA, sigla portugés), Daniel Marçal, informa ba Ajénsia TATOLI, iha resintu Ministériu Finansa, Aitarak-laran, Kinta ne’e.
Nia dehan, husi kazu pozitivu hirak ne’e maka la konsege halo prevensaun agora mak sei kontinua daet ba beibeik.
“Imajina Timor-Leste futuru la’o hanusa kuandu foin-sa’e sira pozitivu hotu ba HIV-SIDA,” nia akresenta.
Notísia relevante : INCSIDA-AMD sensibiliza prevensaun vírus HIV-SIDA ba autoridade sira
Tuir dadus, ema pozitivu ba HIV-SIDA barak liu mai husi munisípiu ne’ebé iha fronteira sira hanesan Bobonaru, Kovalima, Oekusi, inklui Ermera, no Baukau.
“Kazu ne’e sa’e maka’as tanba transmite husi relasaun seksuál, ne’ebé moras ne’e mai husi tan ema bele kontrola maibé husi relasaun seksuál ne’e kontrola ladi’ak atu kombate,” Prezidente institutu tenik.
Nia dehan, mekanizmu atu kombate ne’e ko’alia de’it no halo sensibilizasaun maka’as tanba la iha ai-moruk atu kombate.
“Ita ko’alia de’it atu hasa’e ema-nia konsiénsia hodi muda hahalok, durante ne’e ami halo ona sensibilizasaun, iha munisípiu sira hotu falta postu hitu no suku 200-resin seidauk halo sosializasaun, komunidade barak komprende ona,” nia katak.
Iha biban ne’e, Prezidente institutu hato’o mensajen ba públiku katak tenke kuidadu-an labele halo relasaun seksuál livre tanba bele hadaet lalais moras HIV-SIDA.
“Husu ba ita-nia komunidade hotu atu kuidadu ho transmisaun HIV ne’e, tanba ita laiha ai-moruk atu kura, nune’e atu labele daet moras HIV-SIDA, ema idaidak tenke kontrola-an,” nia hato’o.
Jornalista : Arminda Fonseca
Editora : Julia Chatarina
