DILI, 23 Setembru 2025 (TATOLI)—Sekretariadu Tékniku hamutuk ho Konsellu Munisipál Kombatente Libertasaun Nasionál Dili (CMCLN-sigla portugeza), Tersa ne’e, hala’o konferénsia nasionál daruak hodi hili estrutura foun ba períodu tuirmai (2025-2029), iha Salaun Maubai, Komoro.
Prezidente Konsellu Kombatente Libertasaun Nasionál (CCLN), Vidal de Jesus “Riak Leman” hateten konferénsia daruak hili estrutura foun ba CMCLN Dili ba períodu tuirmai.
“Tuir estatutu orgánika ne’e tinan haat tenke troka, ne’ebé ami la’o tuir estatutu orgániku. Objetivu husi segunda konferénsia ne’e atu sé de’it mak kandidatu-aan ba estrutura foun, nune’e ohin ne’e hahú hili malu depoiz kompete no sé mak sei lidera iha tinan haat mai,” Riak Leman dehan ba jornalista sira.
Riak Leman esklarese konferénsia ne’e komesa kedas loron 05 Agostu iha Lautein, tuir Baukau, Vikeke, Manatutu, Manufahi, Kovalima, Ainaru, Aileu, Ermera, Likisá, Bobonaru, Oekusi no ohin iha Dili.
“Agora sé de’it bele kandidata-aan, tanba orsida sei deside hosi fórum. Karik iha pakote balun mak pasa mak hakarak atu dehan de’it katak tenke kontinua reklamasaun no kontestasaun rihun 61 ne’e. Ida-ne’e ita tenke haree,” nia dehan.
Iha fatin hanesan, Tenente Jenerál Reformadu Lere Anan Timur informa Konsellu Veteranu la dúvida iha segunda konferénsia nasionál prepara ba kongresu nasionál ne’ebé monu iha fulan-Dezembru tinan ne’e.
“Agora imi hili estrutura foun ba Konsellu Veteranu Munisipál Dili, hanesan munisípiu sira seluk,” Lere dehan.
Nune’e mós, Ministru Asuntu Kombatente Libertasaun Nasionál (MAKLN), Gil da Costa Monteiro “Oan-Soru” tenik agora estrutura sé de’it mak eleitu no estrutura ne’ebé eziste ninia responsabilidade atu rezolve reklamasaun no kontestasaun rihun-61 neen no mós asuntu sira seluk,” Oan Soru dehan.
Jornalista: Osória Marques
Editór: Xisto Freitas da Piedade
