DILI, 24 Setembru 2025 (TATOLI)–Primeiru-Ministru (PM), Kay Rala Xanana Gusmão hamutuk ho ninia omólogu malaiu, Anwar Ibrahim, inklui entidade governamentál no korpu diplomátiku sira seluk, Kuarta ne’e, lansa fatuk dahuluk ba kontrusaun foun sentru konvensaun internasionál, ne’ebé sei harii iha Portu Dili.
Konstrusaun sentru ne’e ho objetivu atu revitaliza kapitál iha área tasi-ibun no halo Dili sai destinu ba eventu internasionál boot ruma, promove setór turizmu, hasa’e ekonomia no kria oportunidade foun ba komunidade lokál.
Biban ne’e, PM Xanana hateten, inisiativa ne’e tanba daudaun ne’e Timor-Leste atu hakat ba ekonomia azul no atu sai membru plenu ba Asosiasaun Nasaun Sudeste Aziátiku (ASEAN, sigla inglés), nune’e tenke iha preparasaun fatin ba reuniaun internasionál.
“Ida-ne’e kondisaun ida tamba tuir orden alafabétika, Timor-Leste sei sai membru plenu ASEAN iha loron 29 Outubru, nune’e ita prepara kondisaun infraestrutura ne’ebé to’o tinan 2028 bele konstrui hotu ona,” Xefe Governu hato’o ba Jornalista sira, hafoin serimónia lansamentu, iha Portu Dili.
Notísia relevante : Kalbuadi aprezenta projetu konstrusaun Sentru Internasionál Konvensaun Dili ba KM
Aleinde ne’e, konstrusaun ne’e mós ho hanoin ida atu fó benefísiu ba Timor-Leste, hanesan mós agora hadi’a estrada.
“Ne’e hatudu katak ordenamentu sidade urbana ne’e iha mudansa oituan ona,” nia akresenta.
Iha sorin seluk, Koordenadór Jerál Ministériu Koordenadór Asuntu Ekonómiku, Jorge Rei de Carvalho Martins dehan, Primeiru-Ministru Malázia nia vizita ofisiál ne’e, aproveita partisipa mós iha serimónia ne’e hodi haree dezeñu ne’e tuir padraun internasionál no responde ba preparasaun ba ASEAN ligadu ho asuntu infraestrutura.
“Nune’e ita bele iha infraestrutura ida-ne’ebé iha karater internasionál hodi konvoka sai uma-na’in ba reuniaun internasionál sira hanesan ASEAN no seluk tan,” nia tenik.
Koordenadór ne’e otimista katak sentru konvensaun ne’e bele harii iha tempu badak, ne’ebé foin estimasaun ba dezeñu, seidauk define loloos kompañia no kustu ba projetu referidu, hafoin sei hein fali desizaun tuir mai.
“Ita aselera atu prosesu ne’e lalais hodi koordena ho interministeriál sira hotu nune’e bainhira ita sai uma-na’in ba ASEAN, ita-nia infraestrutura balun tenke prontu ona,” Koordenadór esplika.
Nia hato’o, konstrusaun ne’e sei la fó impaktu ba edifísiu Administrasaun Portuária Timor-Leste (APORTIL), maibé sei dezenvolve tan espasu ba movimentasaun sosa billete.
Dezeñu ne’e prepara husi Governu Timor-Leste rasik no sentru konvensaun internasionál ne’e sei harii iha rai ho medida ektare rua, ne’ebé bele akumula ema to’o 17.000-resin no sei fornese sala enkontru, akuáriu, shoping center, restaurante, inklui jardín ba labarik sira.
Jornalista : Alexandra da Costa
Editora : Julia Chatarina
